Kofoeds Skolemi juullerpalaartitsisoqartoq
Kofoeds Skolemi ilinniartut amerlanerpaat Isumaginninnermi sulisunit ikiorneqarlutillu tapersersorneqartarput.
- Tassalu ilaatigut tamannarpiaq pissutigalugu Isumaginninnermut, Suliffissaqartitsinermut Inuussutissarsiornermullu ingerlatsiviup ullaakkorsioqatiserimmatigut qujalluta ullaakkorsioqatigaagut, Kofoeds Skolemi pilersaarusiortoq, Gujo Thorsteinsson oqarpoq, nangillunilu:
- Sulisut tapersersuillutillu ikiuisarnerinut qujaniarluta juullisiutinik tussiaqattaarfigaagut. Tamannalu assorujussauq pilluarnarpoq, Gujo Thorsteinsson oqarpoq.
Kofoeds Skolep tussiaqattaartartuisa juullisiutit marluk atorpaat Jonathan Motzfeldtillu taalliaa ‘’Annaassisoq tusartigut tamatta’ aamma atorlugu.
- Isumaginninnermut ingerlatsivimmit Kofoeds Skole suleqatigilluartarparput. Kofoeds Skolellu tussiaqattaartartui utoqqaat illuini tussiaqattaarlutik decembarip aallartilaarnerani tusarnaartitsisarput, ingerlatsiviup pisortaa Grethe Nielsen oqarpoq.
