KODA unnugu nersornaasiissaaq!
Unnugu Kodap Kalaallit Nunaanni erinniortunut taalliortunullu ukiumoortumik nersornaasiuttagai piorsarsimasutsikkut illorsuarmi Katuami tunniunneqassapput:
Tusaasarsi tassaavoq siorna 2004-mi immikkut maluginiagassamut nersornaammik tunineqartoq, 26-inik ukiulik Henrik-ip ajugaassutini ”Qiimaneq” atorlugu erinarsortoq.
Henrik Høyer Jensen nipilersortilluni KISHIMA-mik imminut taagortoq oqarpoq siorna nersorinaaserneqarnini puigunaatsuusoq:
-Nuannertorujussuuvoq, puigunaatsorujussuuvoq aamma puigunngisaannassavara pigiuartussaagakku.
-Qanoq misigisimagavit?
-Scene-mukartussaavunga inuppassuarnut sassarlunga. Aamma taamanikkut siullerpaamik aatsaat scene-mut qaqigama, ittoorpunga sajullungalu, kisianni massakkut ilikkarnikuuara, oqarpoq
Henrik Høyer Jensen-ip nersornaaserneqara 20.000 koruuninik aningaasartaqaannarani aamma nipilersornerup silarsuaani periarfissanik ammaassivoq.
-Iluaqutigeqaara, nipilersuut taanna ”qiimaneq” atorakku assut malugivara nuannarineqarnerulersimasoq, taannartaa nuannaarutigineruara. Akissarsiassakka pigakkit soorunami iluamik atorniarpakka nammineq immiussivittaarlunga nammineq immiussiniassagama nammineq pisinikuuvunga, taavalu guitarertaarlunga, oqarpoq.
-Taamatut nersornaasigaaneq, nipilersornerup silarsuaanut ammaassiva?
-Sianerfigisaraluarpaannga, kisianni imatut oqaruma: band-teqartuuguma aalajangersimasumik, nipilersoriaqqusisunut angertassagaluarpunga. Kisianni massakkut ima ikkami DDR-ikkut band-terisarlugit, taakku nipilersussatillutik sianertarput ilaasinnaanersunga, soorunami akuersisarpunga. Ilulissaneeqatiginikuuakka Sisimiuni Aasianni aammalu kujataaneeqatiginikuullugit. Aappaagu aamma aallarnissatsinnut pilersaarpugut, oqarpoq.
Henrik Høyer Jensen-ip nipilersortarnini qatanngutigiit DDR-ikkut nipilersoqatigalugit ingerlataraa
Henrik Høyer Jensen isumaqarpoq nunatsinni nipilersorneq inuunniutigisinnaanagu; kisiannili nunani allani siunissami nipilersorsinnaanissi neriuutigaa:
- Tassami, neriuutigissagaluarpara nunani allanut nipilersoriarsinnaasuuguma. Imaassinnaavoq siunissami nammineq kisimiillunga nammineq band-teqalersunga, taama oqarpoq Henrik Høyer Jensen.
Unnugu Kodap nersornaasiinerani inuit pingasut nersornaaserneqassapput: nersornaasiinerit ukuullutik:
Ukioq manna nersornaat, ukioq manna immikkut maluginiagassamut nersornaat aammalu ataqqinaammik nersornaat.
Kodap nersornaasiinera KNR-tv-kkut toqqaannartumik nalunaaqutaq arfineq-pingasuniit isiginnaarneqarsinnaavoq.
