Koda Sisimiuni nersornaasiiniarpoq

KODA nersornaasiisalermalli nersornaasiineq aatsaat Nuup avataani pissaaq, tassa Sisimiuni.

Nersornaasiinertaani nipilersullammannik aliikkusersuisoqassaaq, assigiinngitsunik erinarsortoqassalluni, nersornaasiinerlu Sisimiut Timersortarfianni pissaaq. Nersornaasiineq pereerpat erinarsortartoq nuannarineqaqisoq, Nina Kreutzmann Jørgensen, tusarnaartitsissaaq.

KODA-p Kalaallit Nunaanni nersornaasiuttagai erinniortunut erinarsuusiortartunullu nersornaataapput, assigiinngitsunilu pingasuni nersornaasiisoqartarpoq, tassaasuni:

Ukioq manna nersornaat, erinarsuusiortartumut nipilersoqatigiinnulluunniit ukiumi pineqartumi immikkut maluginiarneqartariaqartumut tunniunneqartartoq.

Pikkorissumut/piukkunnartumut nersornaat, ukiumi pineqartumi saqqummersumut nutaamut, erinarsuusiortumut imaluunniit nipilersoqatigiinnut tunniunneqartartoq.

Kiisalu Ataqqinaammik nersornaat, erinarsuusiortartumut nipilersoqatigiinnulluunniit nipilersornermut ukiut ingerlaneranni malugisariaqartumik Nunatsinni sunniuteqarsimasumut tunniunneqartarpoq.

Nersornaatit tamarmik immikkut 20.000 koruuninik aningaasartaqarput. Kikkut nersornaaserneqartussatut piukkunneqarnersut uani qaammammi tusarliunneqassapput.