KODA novembarip 15-ianni nersornaasiissaaq
Ukioq manna nersornaat, isumalluarnartumut nersornaat aamma ataqqinaammik nersornaat tamarmik immikkut 20.000 koruuninik aningaasartallit, kikkunnit pineqassanersut komitép sapaatip akunnera tulleq ataatsimiilerunik eqqartorlugit aallartissavai.
Nalilersuinerminni immiussisarfiit, nipilersuutaarniarfiit, lokalradiollu innersuussutaat aallaavigissavaat.
Komité ukuninnga inuttaqarpoq:
Juaaka Lyberth, siulittaasoq, Kaali Olsen – Teammusic-imeersoq, Kurt Egede – KNR-imi nipilersornernik aallakaatitanik aaqqissuisoq, Hanne Qvist, Nuuk Musikskole-meersoq, Ulf Fleischer, Kulturi pillugu siunnersuisoqatigiinneersoq aamma Paninnguaq Abelsen, Sofa Aappalaartumeersoq kiisalu Noah Mølgaard, aviisimi Sermitsiami nipilersornermut tunngasunik aaqqissuisoq.
2006-imi nersornaat Pe-and EL-imut - Peter Lyberthimut, isumalluarnartumut nersornaat Tombamut - Johansinnguaq Rosingimut aamma ataqqinaammik nersornaat Sisimiuneersumut Peter Enoksenimut tunniunneqarput.
