Koda Aasianni nersornaasiissaaq

Nipilersukkanik 2008-mi saqqummersinneqartunut Koda-p nersornaasiinera siorna Sisimiuni ingerlanneqarpoq, Koda nersornaasiisalermalli Nuup avataani siullerpaamik ingerlanneqartumik. Sisimiuni aaqqissuussineq iluatsilluaqaaq. Torrallaaneq taanna ingerlateqqillugu ukioq manna nersornaasiinissat Aasianni pissapput.

- Aasianni Nipiaa Rockfestivalimik aaqqissuisut oqaloqatigilluartarsimavavut, isumaqatigiippugullu KODA-p nersornaasiinissai Nipiaa rockfestevaaleqarnerani pissasut, immikkut aaqqissuussatut ingerlassallutik, Erik Martens, Kodami ilaasortanut paasissutissiisarnermi immikkoortortami pisortaasoq oqarpoq.

- Nuannaarutigeqaara Nipiaa festevaaleqartitsinissamini suleqatiginnikkusuttorujussuummat. Nipiaa Rockfestival Kalaallit Nunaanni festivaalit annerit ilagaat. Taamaattumik pissusissamisoorpoq Koda-p nersornaasiinissaasata ukioq manna Aasianniitsinneqarnissaa, tassami nipilersortartorpassuit festivaaleqarnerata nalaani katersuussimasarmata, oqarpoq.

Koda nersornaatinik pingasunik, Kalaallit Nunaanni nipilersortartuni erinarsuusiortartunut erinniortunullu, tunniussisarpoq. Nersornaatit ataqqinaatip saniatigut tamarmik immikkut 20.000 kr-inik aningaasartaqarput.

Nersornaasiunneqartartut ukuupput:

1) ”Ukioq mannamut nersornaat”

2) ”Pikkorissumut/isumalluarnartumut nersornaat”

3) ”Ataqqinaammik nersornaat”

Nersornaasiinissat pinissaat sioqqutitsiarlugu Koda erinarsuusiornermik erinniornermillu ilaasortaminut pikkorissartitsissaaq ”Songwriter Camp”-imik taaneqartumik aamma ilanngullugu Koda ilaasortaminik immikkut ataatsimiitsitsiniarpoq, samminiarlugit qanoq iliorluni nipilersukkat saqqummersitat internitsimut ikkussuunneqarsinnaanersut.