Knut ataasiliimmat takuniaasorpassuaqarpoq

Nanuaraq Berlinip uumasuusivissuaniitinneqartoq, nuannarineqaqisorlu, Knut, ippassaq ataasiliivoq, Knutimillu alakkaasut imaaginnavipput.

Nanuaraq arnaminit ajattugaasoq maanna alliartupiloorpoq, assiliiniartullu alakkaasullu amerlagaluaqisut aalisakkanik, kuloruujunik salaatimillu kaagiliamik eqqissivilluni nerilluni.

- Nanuaraq imminut tatigisorujussuuvoq, uumasuusivissuup pisortaa Bernhard Blaszkiewitz, tyskit nutaarsiassaqartitsiviannut dpa-mut oqarpoq.

Inuppassuit kaagisortinneqarput, kaagi marcipanimik sanaaq meterinillu marlunnik takissusilik sassaalliutigineqarmat.

Knut, paarsisuminit Thomas Dörfleinimit kaagisortinneqarpoq. Nannumik arnaminit ajattugaasumik ulloq unnuarlu paarsisarnini Dörfleinip siorna tusaamasaassutigilerpaa.

Knut 115 kiilunik maanna oqimaassuseqalereerpoq, avatangiisillu pillugit ilisarnaatinngorsimavoq. Tysklandip avatangiisinut ministeriata Sigmar Gabrielip oqaaserisai naapertorlugit avatangiisit pillugit ilungersuuteqartoqarniarpoq:

- Knuti uumasullu issittumeersut allat pillugit Issittup sikua aatsinnaveersaassavarput, avatangiisinut ministeri oqarpoq.

Silap pissusaa pillugu iliuusissatut tyskit pilersaarutaat matumani pineqarpoq.

Nukissiuutinik atuinermi sipaarutissat pillugit saqqummiussisoqarpoq, ukiup 2020-p tungaanut sipaarutissat 37 milliardit koruunit sinnertussaammagit.

CO2-mik aniatitsinerup 1990-imut sanilliullugu 40 procentimik annikillisarneqarnissaa tyskit pilersaarutigaat.