Knut aneerngaarpoq

Berlinip ilisarnaatitaavatut taasinnaasarput, nanuaranguaq 15-inik qaammatilik, Knut, tamanit ullumi takusarneqarami nuannarineqarluarpoq. Meerarpassuit Knutip assinganik assitalimmik tujuuluaralersuullutik, nuannaarnermit nilliaatigalutik, assiliisartorpassuillu untritilikkaat, Berlinimi Uumasuusivissuarmi qaleriiaatiinnangajallutik nanuaraq inequnaqisoq, perngaammik iniminiit aneertoq, takuniuppaat.

Aviisiliortorpassuit nuna tamalaaneersut, EU-p ukiunik 50-inngortorsiorluni nalliuttorsiorneranut atatillugu Berlinimiittut, suliatik ullumikkut immineerpaat, nanuaqqap nunarsuaq tamakkerlugu tusaamasaasup, nuannarinnitsiminik naapitseqqaarnera nalunaarutigiumallugu.

Nanuaqqallu, 9 kiilup missaanik maanna oqimaassuseqartup, nuannarineqarnini atorluassallugu soorlu nalunngikkaa:

Silaannaap kissatsikkiartorneranut akiuiniarnermi Knut ilisarnaatinngorpoq!

Tassamigooq ”sikoqanngippat aamma nanoqarnavianngilaq” – Tysklandimi avatangiisinut ministeri, Sigmar Gabriel, ullumi taama oqarpoq, Sigmar Gabriel Knutiaqqamut tapertanngorpoq, taamaammat nanuaraq aneerngaarmat, mianersortunnguamillu alloralerluni, taassuma ingerlaqatigaa.

Ullumi pisoq nuannersoq nalunaaquttap akunnerata affaata missaannaani pivoq, Knutiararli siunissami nalunaaquttap akunnerini marlunni ullut tamaasa nuannarinnitsiminut takutittalissaaq.