Knud Rasmussenip illuani katersugaasivimmi persuarsiussapput

Knud Rasmussen-ip illua Hundestedimiittoq kalaallit inuiattut ullorsiorneranni juunip 21-anni akisartorfiusaraluarpoq. Ukioq mannali inuiattut ullorsiornissamut atatillugu annertunngitsumik aaqqissuussisoqassaaq.

Frederiksborg Amtip aviisiani aperisoqarpoq,

Knud Rasmussenip Selskabia ukioq manna aaqqissuussinissanut peqataaniannginnersoq.

Knud Rasmussen-ip illua piffissami kingullermi ajornartorsiulersimavoq. Ammasarnerata sivikillineqarnera aallarteqqaarpoq, katersugaasivinnilu nammineq kajumissutsiminnik sulisut suleqataaniarnerat mattunneqarluni, maannakkut aamma Kalaallit Nunaata namminiilivinniarnerata ukioq manna persuarsiutigineqarnissaa pisinnaassagunarani.

Knud Rasmussenip selskabiata piffissakkilliornertik patsisaanerarpaa, isumaqaramik sapaatip akunneri tallimat junip 21-iata tungaanut pitsaasumik aaqqissuussinissamut piareersarfigissallugit sivikippallaartoq.

Knud Rasmussenip Illuani katersugaasivimmi pisortaq, Frank Allan Rasmussen, aviisimut oqarpoq, ukioq manna inuiattut ullorsiornissaq persuarsiutigineqassasoq.