Knud Rasmussenip Højskolia Nunavummi issuarneqalerpoq
Canadamiut inuiattut aviisianni The Globe and Mailimi ullumi allaaserisat pingaarnersaanni Knud Rasmussenip Højskolia kulturimut tunngasunut atuarfissamut nutaamut Nunavumi Clyde Riverimi sananeqartussamut issuagassatut pitsaanerpaatut nersualaarneqarpoq. Aviisi allappoq Kalaallit Nunaat atuarfiit imminnut ingerlassinnaasut inuiaqatigiillu ineriartortinneranni piorsaavigineqarnerannilu Nunavuminngarnit ukiorpassuarnik siuarsimanerusoq. Aviisi The Globe and Mail allappoq Canadap avannaani aqutsisunit amerlaqisunit Kalaallit Nunaat maligassatut issuagassaqqissutut isigineqartoq, aammattaarlu Canadap issittortaani suut tamaasa eqqarsaatigalugit siuarsimanerusutut isigineqartoq.
Qaammatip tulliani Clyde Riverimi Qeqertaaluup kangiani atuarfik sanallugu aallartinneqassaaq. Naalagaaffeqatigiinnermi naalakkersuisut 100 mio. kr.-inik aningaasaliipput Nunavumilu naalakkersuisut sanatitsinissamut 45 mio. kr.-inik saniatigut aningaasaliillutik.
Atuarfik oqaatigineqareersusut Knud Rasmussenip Højskolianik issuaanerussaaq, Inuit kulturiata, oqaasiisa, kusanartuliaasa ileqqutoqaasalu allat pigiinnarnissaat nakussassarneqarnissaallu pingaartinneqarmata. Atuarfik Canadami atuarfinnit allanit allaanerussaaq, tassa atuarfimmik taaneqarani Piqqusiilirivvimmik taaneqartassagami, isumaqartorooq sunik pingaartitatsinnik peqarfiusoq. Taanna 2011-mi upernaakkut ammarneqassasoq ilimagineqarpoq. Aallaqqaammut nunap immikkoortortaani Nunavumi tamarmeersunik 26-nik atuartoqassaaq.
Clyde Riverimi atuarfimmi atuartitsinerup saniatigut immikkoortortaqarfiit marluk aamma ammarneqassapput, siulleq Baker Lakemi, Qamanittuami Hudsonip Kangerliumarngata kitaaniittumi aappaalu Igloolimmi Qeqertaaluup kitaani. Ilinniartitsisut tassaanerussapput utoqqartat suli nunaminnut asorsuaq attuumassuteqartut, tassami taakkuugamik nunami qeriuaannartumi sikumilu peroriartorsimasuni kinguaariit kingullerpaajusut.
