Knud Rasmussenip eqqaassutissaa Kalaallit Nunaata tungaanut saatilli!

Knud Rasmussen-ip eqqaassutissaa København-imi Strandvejen-imiittoq nunarput Danmarkilu tunullugit nikorfavoq. Tamanna allanngortinniarneqalersoq, peqatigiiffittaap VERA-p siulittaasortaava norskiusoq atuakkiortoq Tor Åge Bringsværd nalunaarpoq.

Peqatigiiiffiup nutaap taaguutaata VERA-p naqinneri isumaqarput VEND RASMUSSEN-Knud Rasmussen-ip eqqaassutissaa illuanut saatilli. Tassa eqqaassutissaq nunarput Danmark-ilu tunullugit Sverige-p tungaanut Skånemut isigivoq. Ukiut 40-t matuma siorna napparneqarmalli apeqqutigineqartuarpoq sooq tununnganersoq.

Avataaneersumit peqatigiiffimmik aallartitsisoqarnera pissuteqarnerugunarpoq avataanit isigalugu maluginiarnarnerunera; meerarpassuillummi ukiut ingerlanerini apeqqutigisarmassuk sooq eqqaassutissaq tununnganersoq.

Ilisimaneqarpormi Knud Rasmussen annertunerusumik Sverige-mut atassuteqanngitsoq.

Danskit eqqaassutissap inissisimanerata innarlernissaa kaluttugisimavaat, taamaammanuna norskemit suliniutigineqalersoq.