Knud Rasmussen Selskabet sap. ak. naanerani immikkut sammisaqartitsissaaq

Naalagaaffeqatigiinni ullut allanngorneqalerfiit nalaanniippugut, tamannalu sammillugu Helsingørip atuagaateqarfiani sapaatit akunnerata naanerani aaqqissuussisoqarniarpoq, Knud Rasmussen Selskabi Issittumi inissisimaneq pillugu sammisaqartitsissalluni.
oktobarip 18-at 2013 05:47

Inuit qitiusumik inissisimasut arlallit oqalugiassapput. Tusagassiortoq Martin Breum arfininngorpat aallarniisuussaaq. Aammattaaq antropologip Frank Sejersenip Issittup nunarsuarmioqatigiinnit soqutigineqalaluttuinnarnera Kalaallit Nunaanit qanoq tiguneqarnersoq oqaluttuarissavaa - Siumullu politikkikkut siunnersortaata Hans Jakob Helmsip Nalaagaaffeqatigiit siunissaat pillugu saqqummiissalluni.

Aaqqissuussineq sapaatiuppat naggaserlugu filmi The Experimental Eskimo, Danmarkimi takuteeqqaarneqassaaq. Filmi taanna Nunavut pilersinniarneqarnerata ilungersuutigineqarneranik oqaluttuartuuvoq.

 Knud Rasmussen Selskabip ukiormanna aaqqissuussinerisa angisuut aappassaraat. Issittumi ilisimasassarsiortup toquneranit ukiut 80-inngornerannut atatillugu februaarip qaammataani issittoq pillugu aamma sapaatit akunnerata naanera ilivitsoq sammisaqartitsisoqarpoq. Peqatigiiffiup nutaatut tamanna anguniarilersimagaa, siulittaasoq Claus Oreskov oqarpoq.

- Knud Rasmussen Selskabip Kunuunnguaq oqaluttuarissallugu siunertatuarinngilaa. Toquneranimmi ukiut taama amerlatigisut qaangiunnerini inuttaa kisiat sammineqarsinnaanngilaq. Taamaammat Kunuunnguup anersaavani
Issittoq siammasinnerusumik samminiarlugu toqqarsimavarput, siulittaasoq oqarpoq.

Knud Rasmussen Selskabi Issittumi maannakkopiaq susoqarneranik paasititsiaaqataasinnaavoq - aamma politikkimut, aningaasaqarnermut nunap inuiisalu pisinnaatitaaffiinut tunngatillugu.