Knud Rasmussen pillugu filmiliaq iluatsilluarpoq
Unnuk iluatsitsiffiusoq pisorlu assissaqanngitsoq. Danskit filmiliornermut attuumassutillit Knud Rasmussenilu pillugu filmiliami ”The Journals of Knud Rasmussen” imi peqataasut sinneri Torontomi ullumi taama misigisimapput.
Canadami illoqarfiit ilaanni tassani, Amerikap nunavittaanut pingaarutilimmik atasutut amerlanernit naatsorsuunneqartartumi, festivaalli aallarnerlugu filmi taanna naluneqanngitsutut siulliullugu takutinneqarpoq.
Filmiliaritittartut, Jacob Cedergren aamma Kim Bodnia, natersuaaqqakkut tummarfissakkut aappaluttukkut festivaalimi atorneqartukkut qummukaqataapput. Filmiliornermi ingerlatsisoq, Vibeke Vogel, oqarpoq, inersuarmi ulikkaavissumi tikilluaqquneqarnertik tupinnangaarmat oqaluttuarisassaanngingajattoq.
- Qanoq oqarnissaq tamatigungajak ajornakusoortarpoq. Filmili allaanerugaluaqisoq pisariusimagaluaqisorlu Canadami tusagassiutinit tamanit uitsatigineqaqaaq, qanimut assilisanik assitaqaqaaq, oqaloqatigiinnittaqarpiarnanilu. Takutinneqarfiani tamani isummat assigiinngittassagunaqaat, nuannarineqarujussuanngikkuni aamma soorunalimi nuanniigineqarsinnaassaaq, Vibeke Vogel oqarpoq.
Aviisimi The Starimi filmit nutaat pillugit allaaserinnittartoq naliliivoq, Film Festivaalimi filmip ”The Journals of Knud Rasmussen”-ip siulliullugu takutinneqarnera soqutiginartuusoq. Filmi iluatsilluartutut silassorissumillu suliaasutut aviisip nalilerpaa, nuannarineqarujussuarnissaali ilimaginagu.
"The Journals of Knud Rasmussen” Københavnimi filmfestivaalimi qaammatip uuma ingerlanerani takutinneqassaaq, Danmarkimilu ukioru novembarimi takuteqqaarneqassaaq.
