Knud Rasmussen pillugu filmi assigiinngitsunik isumaqarfigineqarpoq
Filmi ”The Journals of Knud Rasmussen” sumiluunniit takuneqaruni tupigusuutigineqassaqaaq. Danskeq, Vibeke Vogel, Barok filmimi ingerlatsisuusoq taama siulittuivoq.
Filmimi ilitsersuisuupput canadamiut suleqatigiittutoqanngulersut, Zacharias Kunuk aamma Norman Cohn, taakku filmi akissarsitinneqarsimasoq ”Atanarjuat, The fast runner” pilersissimavaat.
Taamaattumik fiilmiliaat nutaaq isumalluarfigineqarsimaqaaq, Københavnimi siullermeertumik takutinneqaqqaarmat.
Kisiannili isiginnaartut ilaasa pakatsiffigisimavaat:
Nassuerutigissavara pikkunaatsoorlungalu pakatsikujukkama. Oqaluttuartavia allaanngilaq saqqumminngitsoortoq. Allaanngilaq oqaluttuartaa takkutilersoq, issialluta eqqarsartaraanga, takkutillatsiartarpormi – kisiannili tamakkiisuunngitsumik. Taama fiilminik ilitsersuisartoq Karen Littauer fiilmertarfimmiit anillammat oqarpoq. Aamma fiilmiliassanik manuskriptiliortartoq Mogens Kløvedal The journals of Knud Rasmussen pakatsikujuffigisimavaa imatullu oqaaseqarpoq: Imminut inunnik misiginneqateqarlungalu inoqatinnillu isiginnittartutut taasinnaavunga, kisiannili tamanna maani misiginngitsoorpara. Isiginnaaginnartutulli misigisimavunga. Tamannalumi misigisaq pikkugisassaanngilaq.
Nunatsiaq Newsip nalunaarutigaa, canadamiut fiilminik naliliisartut aamma pakatsiffigilaarsimagitsik, fiilmiliaata siulliup nuannaarutigineqarnera angoqqajannginnerarlugu.
Filminik naliliisartut Variety.com naliliinerat issuaavigissagaanni imaappoq: Filmi canadap avataanut aarrup neqaatulli tunisassiarissallugu pilerinaatsigaaq
Filmi nalunaaquttap akunnerinik marlungajannik sivisutigisoq inooriaatsit assigiinngitsut marluk aporaannerannik oqaluttuartuuvoq, tassa Illuliup inuisa, angakkoq Aava illuanik – europamiullu inooriaasaat kristumiuussuserlu Knud Rasmussen, Peter Freuchen Therkel Mathiassenilu illersuisoralugit inooriaatsit marluiit naapinnerat Inuit isaannit isigalugu fiilmiliaavoq, Knud Rasmussenillu isigineqarnera sungiusimasamit allaaneq saqqummiunneqarpoq. Ataqqinartuunerat isamittutullusooq ippoq, Aqqaluk Lynge oqarpoq.
Karen Littauerili allaanerusumik oqarpoq:
Knud Rasmussen ilisimasaqarfiginngitsuugukku pisinnaasaalu filmimi ilanngunneqanngitsut nalusuugukkit, taava taamaallaat angut ingilluni pujortaatitorusaartoq kalaallisullu oqaminiinnarsinnaasoq takuinnassagaluarpara, allamik naamerluinnaq.
