Knud Rasmussen nutaamik katersugaasiviliuunneqassassoq
Knud Rasmussenip illumini ini sullivigisartagaa siorna oktobarimi ikuallarujussuarpoq. Ini taanna upernaaru ammarneqaqqissasoq katersugaasivimmit maannamut oqaatigineqartaraluarpoq. Frederiksborg Amts Aviisimili allassimasut naapertorlugit tamanna pisinnaajunnaarpoq.
Inneq illup pingaarnersaanut anngutinngitsoq, aamma inip sulliviata qalianiit siaruaatinngitsoq, qujanartumik qaminneqarpoq. Pequtilli arlallit imermit innarlerneqarput, aviisinillu qanganitsanit qiukkat aseruissimallutik. Katersugaasiviup matunera 40.000 koruuninik qaammammut ajunaarutaasarpoq.
Pisimasorli alianartoq siunissami iluaqutaasussanut katersugaasiviup atorluarniarpaa. Iikkat aallaqqaammut qalipaataat illup iluarsaanneqarnerani paasiniarneqarniarput. Pequtillu Kunuunnguup nalaanisut inissitsiterneqassapput.
Knud Rasmussenimut Katersugaasiviliortoqarnissaa Hundested Kommunep aamma pilersaarutigaa, aningaasaliinissarlu maanna misissorneqarluni.
