"Knud Rasmussen" nakkutilliilissaaq

Allattoq Najaaraq Egede
septembarip 28-at 2007 05:36

Knud Rasmussen aappaagumiit nunatta imartaanik nakkutilliilissaaq.

Matumani issittumut ilisimasassarsiortartoq Knud Rasmussen pineqanngilaq, kisianniliuna aalisarnermi nakkutiliissut taama atilik pineqartoq, taanna qanittukkut Danmarkimi Skagenimi atserneqarpoq.

Nakkutilliissut nutaaq ilaatigut sinerissamik nakkutilliissaaq, killeqarfinnik nakkutiginnissalluni, aamma aalisarnermik nakkutilliissalluni.

Angallatinut nakkutilliissutitoqqanut naleqqiullugu nutaartaavoq, aqqaneq marlunnik ilaasoqarsinnaasumik annanniutaasinnaasumik angallatitaqarami, taama oqaluttuarpoq kontreadmiral Finn Hansen Savalimmiuni sakkutooqarfiup nittartagaanut.

Nakkutilliissut Savalimmiuni naalakkersuisut siulittaasuannit Jóannes Eidesgaardimit atserneqarpoq. Knud Rasmussenimik atserneqarneratigut naalagaaffeqatigiinnermi attaveqaqatigiinneq ersersinniarneqartoq kontreadmiral Finn Hansen oqarpoq.

Knud Rasmussenip 2008-mi juulimit angalalernissaa naatsorsuutigineqarpoq.