Knud Kristiansen: Narsarmiut qanoq ikiorneqarnissaat suli nalunarallarpoq
- Pisoq tamanna ajuusaarnaqisoq pisortaasugut suleqatigiilluta qanoq iliuuseqarfigisariaqarparput. Kujataani politikerit ulluni kingullerni oqariartuutaat Naalakkersuisunit qanimut malinnaaffigaagut. Taamaammat kommuni suleqatigalugu qanoq iliuuseqarnissarput oqaloqatigiissutigissavarput, Ineqarnermut, Sanaartornermut Attaveqarnermullu Naalakkersuisoq, Knud Kristiansen KNR-imut taama oqarpoq.
Aamma atuaruk 89 lejemål i Narsaq kan regne at blive smidt ud i 2015
Narsami inissiani 89-ini ineqartut anisitaanissaat pinngitsoortinneqassappat, oqartussat kommunimullu qinikkat piaartumik qanoq iliuuseqarnissaat pisariaqartoq, Kommune Kujallermi kommunalbestyrelsimut ilaasortaq, Josef Petersen, Atassut KNR-imut ippassaq ima oqarpoq.
- Narsami innuttaasut ilaasa inuuniarnikkut atugaat ukiuni kingullerni ajorsiartuinnavissimapput. Suliffissaaleqineq annertoorujussuarmik pilersimavoq. Tamakkulu kinguneraat inuit ajornartorsiuteqalerneri. Tamakkulu tamarmik aamma kinguneralugu, inissianik attartortut amerligaluttuinnartut akiliisinnaajunnaartarnerat.
Aamma atuaruk A/S INI: Anisitaasoqassatillugu politiit ornigukkaangata akiliinermik kinguneqartarpoq
Kommunalbestyrelsimut ilaasortat paasiniaallutik aallartereerput
Josef Petersenip kommunimi politikereqatai allat, Benjamin Kielsen, Siumut, Karla E. Bisgård aamma Siumut kiisalu Avaaraq Olsen, Inuit Ataqatigiit, tamanna pillugu aamma qisuariarput allallutik, Narsami innuttaasut taama amerlatigisut anisitaanissaannut suut pissutaanersut piaartumik paasiniarneqalersut.
Tamanna pillugu Ineqarnermut Naalakkersuisoq ima oqarpoq:
- Uagut tungitsinnit borgmesteri oqaloqatigissavarput. Taamaalioreerutta Kommune Kujallermi politikerit aalajangissavaat, pisoq inunnik isumaginnittoqarfiup ingerlatissaneraa. Taamaattumik neriuutigaarput pisoq pillugu borgmesteri ulluni qaninnerni oqaloqatigiumaarlutigu.
Ineqarnermut, Sanaartornermut Attaveqarnermullu Naalakkersuisoq, Knud Kristiansen aamma oqarpoq, anisitaasussat meerartaqarpata taakku immikkut qanoq iliuuseqarfigineqarnissaat pillugit, Kommune Kujallermi borgmesteri oqaloqatigineqassasoq.
