Knud Kristiansen Atassummit tunuartoq
Atassutip siulittaasuata Knud Kristiansenip partiimit tunuarnini nalunaarutigaa.
Knud Kristiansen, Atassutip siulittaasua.
Allattoq Simon Uldum -
januaarip 10-at 2017 06:24
Atassutip siulittaasua Knud Kristiansen partiimi siulittaasutut Atassummiillu tunuarpoq.
- Ullumi tujormeqalunga, allatullu ajornartumik tamaanga killittariaqarama, Atassut-mi siulersuisuunerit ilisimatippakka, siulittaasutut Atassut-miillu tunuarlunga, Knud Kristiansen Facebookimi quppernermini taama nalunaaruteqarpoq.
Knud Kristiansen aamma allappoq partii qimatani innarlerusunnginnamiuk tusagassiutitigut nassuiaanissani kissaatiginagu.
- Qinersisinnullu ajuusaaqaanga taama aalajangertariaqarninnut. Piffissanngorpat nassuiaateqassaanga, Knud Kristiansen taama allappoq.
Knud Kristiansen Inatsisartuni kommunimilu attaviitsutut ingerlaqqissalluni aamma allappoq.
