Knud Kristiansen Atassummi siulittaasussatut qinigassanngortippoq

Tamatumuuna partii marlunnik qinigassanngortitaqalersutut isikkoqalerpoq, Inatsisartunut ilaasortap Finn Karlsenip, partiip kingullermik ajorsarnerata kingorna tunuarnini nalunaarutigimmaguli.

Sapaatip akunnerani kingullermi partiip siornatigut Inatsisartuni ilaasortaatitaa Godmand Rasmussen nalunaarpoq, nammineq oqarneratut - allat piumanngippata qinigassanngortinniarluni.

Maannali tassa Knud Kristiansen taamaaliorusulerpoq. Sermitsiamilu allaaserisaq naapertorlugu Atassutip pinngorfimminut uteqqinnissaa taassuma kissaatigaa.

- Partiiuvugut liberaliusut, naleqartitavullu pingaarnerit saqqummiunneqassapput, Knud Kristiansen oqarpoq.

Tamatumani ilaatigut suliffeqarfiit pisortanit pigineqartut, soorlu tunisassiorfiit, namminersortunnngorsarneqarnissaat pineqarpoq, taamaattorli Nukissiorfiit pineqaratik.

- Nukissiorfiit namminersortunngorsarneqarnissaat akerleraarput, pissutigalugu nunaqarfinni isorliunerusunilu innuttaasut pitsaannginnerusumik atugaqalernissaat annilaanngatigigatsigu, Knud Kristiansen oqarpoq.

Taanna isumaqarpoq inuussutissarsiuteqartut ineriartornissaminnut periarfissaat eqqarsaatigalugit inatsit sukangavallaartoq.

Aammattaaq taanna isumaqarpoq kinguaariit nikinnissaat partiimi maanna pisariaqartoq.

- Inuusuttut takkunnissaannut qinersisartullu akornanni tatiginninnerup pilerseqqinnissaanut piffissanngorpoq, siulittaasutut qinigassanngortittoq 38-nik ukiulik Upernavimmilu suliffeqarfimmik Kristiansen Group-imik 14-inik sulisulimmik ingerlatsisoq, taama oqarpoq.