KNT suli akersuuppoq

Taamaakkaluartoq pisortap siulersuisunilu siulittaasup ingerlatseqatigiiffiup ingerlaqqinnissanut tuniutiinnanngillat.

- Neriuppunga tassunga killiinnassanngitsoq aamma tunisassiorfik peerunnavianngilaq, tassaniittuaannassaaq, soqutiginnittut aamma uagut periarfissaqartilluta KNT-ip ingerlaqqinnissaanut ikiuuttuassaagut KNT-imi pisortaq Mikael Petersen l Qanooruumut taama oqarpoq.

KNT-ip tunissassiorfiani Niaqornani sulisut tallimat arfiinillit piginneqatigiiffiup akiliisinnaajunaarneratigut eqqugaapput taamatullu Niaqornani innutaasut 50-it missaanniittut aamma eqqugaapput, KNT-ip Niaqorniani tunisassiorfia tunitsivittut periarfissatuaammat.

Aalisartut aalisagartatik Uumannamut tuniartortariaqarpaat.

Aamma atuaruk KNT akiliisinnaajunnaartutut nalunaarutigineqartoq

Piginneqatigiiffiup siulersuisuini siulittaasup piginneqatigiiffiup akilisiinnaajunnaartup arlaatigut ingerlaqqinnissaanut neriuuteqarpoq.

- Suli neriuuteqarpugut imaassinnaavoq ingerlariaqqittugut arlaatigut, piginneqataassutinik pigisaqartut taakkua qanoq piniarnersut paasinarsissaaq aamma KNT-mi siulersuisut jannuaarimi ataatsimiippata suniarnersut paasinarsissaaq, KNT-ip siulersuisuini siulittaasoq Jakob Kruse taama oqarpoq.

KNT-imi piginneqataassutinik pigisaqartut jannuarip qaammataani ataatsimiissapput.

Maanna eqqartuussiviup aalajangertussanngorpaa

Kalaalit Nunaanni eqqartuusiviit akiliisinnaajunnaartup pigisaanik akisussaasumik toqqaavoq, pigineqatigiiffiup pigisaanik sapinngisamik amerlanerpaanik annaassiniartussamik, KNT-p akiitsoqarfii aningaasanik aamma pissarsiniassammata.

Suliassap tullia tassaassaaq, KNT-ip pigisaasa sinnerinik tigusinissaminnik soqutiginnittunik nassaarniarnissaaq. uanilu Mikael Petersen aamma Jakob Kruse piginneqatigiiffiup ingerlaqqinnissaanik soqutiginnipput.

Piginneqatigiiffik KNT 2009-mi pilersinneqarpoq, ilaatigut aalisarnermut naalakkersuisoq Karl-Kristian Kruse aamma parti Siumut allattanera Mikael Petersen pilersitseqaallutik.

Akiliisinnaajunnaartup pigisaanik akisussaasup  Niels Hansen Damnip uppernarsarpaa,  piginneqatigiiffiup KNT-ip pigisaasa ilaannik piginnittuulernissamik soqutiginnittoqartoq, maannamulli siusippallaartoq taakkua qanoq pineqassanersut.