KNRip aningaasaqarniarnera ilungersunarpoq
1,9 millioner koruuninik amimartoorneq peqquteqarpoq pilerisaarutinit isertitat appariartornerannik pitsanngorsaanermullu atatillugu akissarsianut aningaasartuuteqarnermik.
Kukkunersiuisut ukiut pingajussaat uparuarpaat KNRip nammineq aningaasaqarnerminik ajornartorsiuteqarnera.
- Nunatta karsia suliffeqarfimmut piffissap ilaatigut immikkut illuinnartumik tapiissuteqanngippat tamatuma iluarsiissuteqarfigineqarnissaa takujuminaappoq, KNRip siulersuisui nutaat ivertinneqarnermik kingorna ileqquusumik ataatsimeerngaareerlutik nalunaarput.
Kukkunersiuisut maanna sukannersumik piumasaraat KNRip ingerlatsinermigut sukaterinissaa.
- KNR-imi siulersuisunngortut paasivaat akiitsutigut nammakkigaaneq nutaanillu aningaasaliinissamik pisariaqartitsineq suli unammillernartuusoq annertooq. Innuttaasunik kiffartuussiviup KNR-ip isiginnaartartunik naalaartartunillu kiffartuussinissaminut aningaasatigut pisariaqartunik periarfissaqartinnissaa qulakkeerniarlugu siulersuisunngortut piginnittut oqaloqatigerusuppaat, KNRimi siulersuisut siulittaasuat Hans Peter Poulsen oqarpoq.