KNRip aamma GIFip timersorneq saqqumilaarnerutinniarpaat
GIF-mi allattuuneq Jonas Jensen aamma KNR-mi pisortaq Karl Henrik Simonsen ataasinngorneq martsip arfineq aappaat ukiuni pingasuni atuuttussamik suleqatigiinnissamik isumaqatigiissummut atsioqatigiipput.
Timersorneq pillugu aallakaatitassiat arlallit KNR-mi piareersarneqarput suliarineqartussat ilaanniilluni ilinniaatigaluni timersortarneq.
Utoqqalineq pillugu aamma arlalinnik aallakaatitassiortoqalerpoq.
KNR-ip aamma GIF-ip suleqatigiinnissamik isumaqatigiissutaat sammisanut sisamanut immikkoortitaarneqarpoq tassuuna timersornerup saqqumilaarnerunissaa aamma atortorissaarutinik inerisaanissaq anguniarneqarluni.
Taakku tassaapput:
- Unamminernik aammalu allatut pitinneqartut malittaralugit tusagassiarisarnissaat
- Aallakaatitassallugu GIF-ip ukiumoortumik nersornaasersuilluni aaqqissuuttagaa ”Maligassiuisut”
- Timersornerit peqqissutsimullu tunngasut nittarsaallugit erseqqissuliarisassallugit
- Teknikkikkut atortunik ineriartortitsinissaq atuinissarlu annertusarlugit
Timersorneq ataatsimuulersitsisarpoq
- Timersorneq nunatsinni initoorujussuuvoq aammalu ataqatigiinnermik pilersitseqataasuusarluni – aallussisut, isiginnaartut nunallu immineq iluata akornanni, GIF-mi allattuuneq Jonas Jensen oqapoq.
- Taamaattumik nuannaarutigisorujussuuarput KNR-i isumaqatigiissuteqarfigigatsigu, timersornerup ataavartumik ersarissarnissaa siammarternissaalu KNR qanimut peqatigalugu isumannaarsinnaaleratsigu, Jonas Jensen itisiliivoq.
GIF-mik suleqateqarnermi maanna sinaakkutissaqalerneq KNR-mit aamma nuannaarutigineqarpoq.
- Timersorneq Kalaallit Nunaanni piorsarsimassutsimi pisartut annersarivaat. Taamaattumik KNR-ip tungaanit kissaatigineqarpoq GIF-imik suleqateqarnerup nukittorsarnissaa. Tamatumalu nukittorsaanissaa angujumallugu KNR timersornermut tunngasunik ataqatigiissaarisussamik atorfinitsitsinikuuvoq, web, radio tv-lu atorlugit malittarinnittarnerit nukittorsarumallugit, KNR-mi pisortaq Karl Henrik Simonsen oqarpoq.