KNR.gl-imi isummersuutit unitsinneqarmata iluarineqanngilaq
Nittartakkami oqallittarfiup iluatsittumik ingerlasup matuneqarnera Atassutip politikkikkut oqaaseqartartuata Steen Lyngep paasisinnaanagu eqqumiigivaa.
KNR-ip nittartagaani oqallittarfiup atorluarneqarnera iluatsittutut oqaatigineqarsinnaagaluartoq, isummersorfimmi allattartartut, isummersorfimmi allannissamut malittarisassat unioqqutittarpaat, tamakkualu nakkutigineqarnissaanut piffissarujussuaq atorneqartariaqartarluni, KNR-imi Siuarsaavimmi pisortaq, Martin Chemnitz oqarpoq. KNR-ip nittartartagaa 6.000-it 7.000-illu missaannik amerlassuseqartunit ullormut alakkarneqartarpoq, tamannalu iluatsittutut oqaatigineqarsinnaavoq.
Ajoraluartumik isummersortarfimmi allattartut ilaat inoqatinik nikanarsaasunik allattarput, isummersortarfimmi maleriuagassat unioqqutillugit, tamakkualu pinaveersaartinniarlugit piffisamik annertuumik atuisoqartarpoq.
KNR-ip nittartagaata nutarneqarnera naammasseriarpat, neriuutigineqarpoq oqallittarfimmi isummersuutinik nakkutiginnillunilu tigooraasussamik isumaginnittoqalerumaartoq.
