KNR-TV-mi pinerluttorsiortut qatsuppai
Inatsisartuni ilaasortaq Kristian Jeremiassen Atassummeersoq Sermitsiamut taama oqarpoq.
– KNR-TV-kkut suut aallakaatinneqassanersut politikeritut akuliunnissannut pissutissaqanngilanga, kisiannili pinerluttorsiornerit sapaatip-akunnera naangajallugu aallakaatinneqartartut taarserlugit kalaallisut aallakaatitassianik kalaallinut paasinartunik aallakaatitsisoqartariaqartoq isumaqarpunga, Kristian Jeremiassen taama oqarpoq, taassuma aallakaatitat kalaallisut oqaasertallit amerlinissaannut aningaasaliissutinik qaffaasoqassanersoq naalakkersuisunut apeqquteqaatigaa.
– »Sofa aappalaartoq« nuannarisorujussuuarput tassa meeqqaniit utoqqarnut tamakkerluta, kisiannili aningaasat apeqqutaallutik aallakaatitsineq akuttusuumik ingerlanneqartarpoq, naak massakkut akulikinnerulernikuugaluartoq. Meeqqanullu aallakaatitassiat kalaallisut suliat minnerpaamik ullut tamaasa aallakaatinneqartariaqartut, Kristian Jeremiassen isumaqarpoq.
