KNR-TV-mi OL takussaangaatsiassaaq
Timersornermik soqutigisalinnut aasaq manna soqutiginartorpassuaqarpoq.
Arsaannermi siullermik EM-ertoqarpoq. Sikkilernersuaq Tour de France taava aallartippoq, sapaatiuppallu naammassissalluni.
Ullumimiillu sapaatip akunnera ataaseq qaangiuppat - tallimanngorpat juulip 27-anni - Londonimi OL-ertoqarnissaa ammaanersiorneqassaaq.
Nunarsuarmi timersornermik isiginnaartitsinerit annersaanni, timersortartut tuusintilikkaat nunanit assigiinngitsunit 205-ineersut peqataassapput.
Nunatsinni tv-kkut isiginnaartartut timersornermik nuannarisallit OL-ertoqarnerani timersortorpassuarnik isiginnaarnissartik qilanaarilereersinnaavaat.
Ammaanersiorneq tulliani tallimanngorpat ualikkut sisamanut aallarniutigalugu aallakaatinneqassaaq, nalunaaquttallu-akunnerini pingasuni tamakkerlugu aallakaatinneqassalluni.
Tamatuma kingorna DR-ip toqqaannartumik aallakaatitsinera KNR-TV-p arfininngornermit juulip ulluisa 28-annit aallakaatittassavaa, ullaat tamaasa arfernup qeqqanut aallartittassalluni, ualilluarneratalu tungaanut toqqaannartumik aallakaatinneqartassalluni.
Ualikkut qassit tungaanut aallakaatitsisoqartarnissaa ullormiit ullormut allanngorassaaq, ullaakkulli aallakaatitsinerup aallartittarfissaa, tassa ullaakkut arfernup qeqqanut, sapaat aggustip ulluisa aqqaneq-aappaat ilanngullugu aalajangersimasuuvoq.
Tamatuma saniatigut ullormi pisut pingaarnersiorlugit, unnukkut qulingiluanut TV-Aviisip kingorna aallakaatitsisoqartassaaq.
Nunani OL-imut peqataatitaqartussani Tuluit Nunaat timersortartunik amerlanerpaanik peqataatitaqarluni 542-nik peqataatitaqassaaq USA-lu tulliulluni timersortartunik 530-nik peqataatitaqassalluni.
Danmark timersortartunik 113-inik peqataatitaqassaaq, taakkunannga savalimmiormiu ataaseq peqataassalluni, tassa isorartuumut naluttartoq, Pál Joensen, Danmark sinnerlugu peqataassagami, Savalimmiunimi timersoqatigiit kattuffiat nammineerluni OL-imut peqataatitaqarsinnaanngilaq.
Nunatsinni Timersoqatigiit Kattuffianni siulersuisuni ilaasortat marluk Londonimi alaatsinaattutut peqataassasut, Timersoqatigiit Kattuffiata siulersuisuini siulittaasup, Nuka Kleemannip oqaatigaa.