KNR TV-mi inuusuttunut aallakaatitassiaq nutaaq

Asanninneq, nipilersorneq, ikiaroornartut ilinniartitaanerlu – tamakkuupput KNR-ip inuusuttunut aallakaatitassiaani nutaami taaguutilimmi " Inuusuttut Silarsuaat"-nni sammineqartussat ilaat. Aallakaatitassiaq siullermik takutinneqassaaq sisamanngornermi januaarip 22-ani nalunaaqutaq 19.55.
januaarip 13-at 2009 11:16

Inuusuttut Silarsuaat sisamanngornerit allortarlugit aallakaatinneqartassaaq aallakaatitassiamilu siullermi inuusuttunut aaqqissuisoqarfiup ullumikkut Kalaallit Nunaanni inuusuttuuneq qanorpiaq oqaatigisariaqarnersoq aallarniutigissavaa.

- Kalalalit imaannaanngitsorpassuit oqaluttuariniarpavut, inuusuttut allat inuunerup tamakkiisumik atornissaanut isumassarsisinniarlugit. Tamanna ilumoorutivillugu ingerlanneqassaaq, soorunalimi aamma aliikkusersuinertut ilusilerlugu, taama oqarpoq inuusuttunut aallakaatitassiami aaqqissuisoq Aka Maria Koch Hansen.

Inuusuttut Silarsuaat soorunami aamma knr.gl-imi nassaarineqarsinnaavoq. Tassani aallakaatitassiat oqaluuserineqarsinnaapput, inuulluaqqussutinik nassitsisoqarsinnaalluni aallakaatitassiortunullu siunnersuuteqartoqarsinnaalluni aallakaatinneqartullu takoqqinneqarsinnaallutik.

Inuusuttut Silarsuaat aammattaaq tassaassaq 16:9-tut ilusilerlugu KNR-ip aallakaatitassiaa siulleq.