KNR-TV-kkut inuusuttunut aallakaatinneqartalissaaq
Kalaallit Nunaanni inuusuttut namminneq oqaluttuatik migisatillu pillugit allagaqarlutik oqalliseqataanissaat siunertaralugu aallakaatitassiaq Oqarit aallartittussanngorpoq.
Oqarit siullerpaamik sisamanngornermi januarip 21-anni unnukkut nalunaaqutaq qulinut allakaatinneqassaaq. Oqarit aallakaatinneqareerpat aallakaatitami sammineqartut aallaavigalugit radiukkut inuusuttut sianerlutik isummersornissaminnut periarfissaqassapput.
Aallakaatitami siullermi Oqarit-mi aallakaatinneqartartussat pillugit ilisarititsisoqassaaq, siunissamilu Nunatsinni pisut pillugit aallakaatitsisarnissaq siunertarineqartoq, Oqarit-mi aaqqissuisoq, Pipaluk Kreutzmann Jørgensen allappoq.
Aggo Rosing Olsen, Connie Kristoffersen aamma Mudi Kramer Berthelsen Oqarit-mi aallakaatitassiortuussapput.