KNR periarfissarissaarnerulissaaq
Radiokkut TV-kullu aallakaatitsisarneq pillugu peqqussutissaq nutaaq partiinit kattusseqatigiinnillu tusarnaartartunut isiginnaartartunullu iluaqutaalissasoq qularutigineqanngilaq.
Peqqussutissaq pillugu Inatsisartuni partiit akissuteqarnerminni kalaallisut aallakaatitassiat amerliallannerannik kinguneqassasoq ilimagaat. Ellen Christoffersenip neriuutigaa TV-qarfinnit aallakaatitassiat amerlissasut.
- Tusarnaartartunut isiginnaartartunullu sunniutissaasa ilagissagaat TV-qarfiit radioqarfiillu pilersueqataanerisigut kalaallisut oqaasertalersorneqartunik aallakaatitsisarnerup annertusinera. Aamma isumaqarpoq tusarnaartartut isiginnaartartullu kattuffeqalerunik KNR-ip siulersuisuini ilaasortaatitaqalernissaannik takorluuineq pitsaasuusoq.
Inuit Ataqatigiit oqaaseqartuata Georg Olsenip aamma qularinngilaa peqqussut atuutileriarpat pitsaasumik kinguneqartitsilersinnaasoq. DR-illi TV2-llu aallakaatittagaasa immikkut kanaliliuunnissaat eqqarsarnartoqartippaa.
- Soqutiginarpoq kanalit allat amerlanerusut qanoq ililluta nunatsinni aallakaatinneqartalernissaat eqqartussallutigu, kisianni uani eqqartorneqartumi taakku toqqaannartumik pineqanngillat. Kisianni matuma nassatarisaanik eqqartuinissarput aamma aningaasanik atuinissarput ammaatissavarput, taamaalillutalu qanoq alloriaqqittoqassanersoq inatsisartut taakkunanngalu suliaqartut suliareqqittussaassavaat, Georg Olsen oqarpoq.
Siumut oqaaseqartitaa Doris Jakobsen aamma isumalluarpoq.
- Peqqussutissamik siunnersuut nutaaq annertuumik assigiingitsutigut oqilisaassissaaq, aqutsinikkut sulisoqarnikkut anguniakkanillu pikkorissaasarnikkut. Assersuutigalugu allaffissornermi aqutsinermi nakkutiginninneq siunnersuinerlu pitsaanerusumik ingerlanissaa anguniarlugu ataatsimiititaliortoqarpoq, radio- TV- nævnimik taaneqartumik, Doris Jakobsen oqarpoq.
Siumup naalakkersuisunut kaammattuutigaa KNR-p atortuisa nutarternissaannut aningaasat 2006-mi ilaanngunneqartariaqartut.
Peqqussutissap KNR-mut siunissami erseqqinnerusumik aningaasaliisarnissamik kinguneqarnissaa Per Berthelsenip (D) ilimagaa, KNR-li siulersuisuini ilaasortat toqqarneqartarnerata allanngortinniarneqarnera iluarinngilaa.
- Demokraatit pingaartippaat inuiaqatigiit tatigalugit inissitaanik siulersuisulersornissaa. Radiokkut TV-kullu aallakaatitassiortarneq aningaasarsiornerinnarmik toqqammaveqanngilaq, politiskiusorujussuullunili, Per Berthelsen oqarpoq.
Kattusseqatigiinnit Anthon Frederikseni isumaqarpoq radiokkut TV-kullu aallakaatitsisarnermut peqqussut inunnut pingaaruteqartumik inissisimalissasoq.
