KNR-p siulersuisui nassuiaasariaqarput

KNR-ip qaammatini kingullerni tallimani pisortaata, Jacob Abelsenip soraarniuteqareerluni sapaatip akunnerata tulliani suliunnaarnissaa, sulisunut toqqissisimanarnavianngitsoq, tusagassiortunngorniat ilinniarfianni pisortaq, Naja Paulsen naliliisikkatigu taanna taama oqarpoq.

Allattoq Paarnaq Hansen, Apollo Jeremiassen

oktobarip 20-at 2015 18:00

Aamma oqarluni KNR-imi pisortat assigiinngitsut tallimat ukiut arfineq marluk ingerlaneranni pisortaasarsimasut sivikitsumik pisortaareerlutillu tunuartarneri toqqossisimatitsissappat tamanna paasisinnaakutsoorlugu.

- Oqartariaqarpunga KNR-imi pisortat sivikitsumik atorfeqareerlutik soraartarnerat sulisunut tamanna toqqissisimanarnavianngilaq, Naja Paulsen oqarpoq.

Aamma atuaruk KNR-ip pisortaanera atorfimminit tunuarpoq

KNR-p pisortaa kingulleq, Jacob Abelsen maajip aallaqqaataani ukioq manna atorfinitsinneqarpoq. Taassuma taarserlugu, ukiup aappaata affaani pisortaasoq, Søren Lennert Mortensen. Allat ukiuni arfineq marlunni kingullerni sivikitsumik pisortaasartut tassaapput Lars Sandgreen, Ivalo Egede aamma Jan Berg, taanna taartaaginnarallartutut atorfeqarluni.

Aamma atuaruk KNR-ip pisortassaanik toqqaasoqarpoq

KNR-p siulersuisuinit Jacob Abelsenip sooq pisortaajunnaarnera pillugu, siulittaasumut Nukaaraq Euginiusimut oqaaseqarfigitinniaraluarparput, taannalu oqaaseqarsunnani KNR-imut oqarpoq.

Aamma atuaruk KNR Voicep tunngavia tammarpoq

Piffissap taama sivikitsigisup iluani pisortat taarseraannerat aamma pisortap, Jacob Abelsenip sooq suliunnaarnera, KNR-p siulersuisuinit nassuiarneqartariaqartoq, Naja Paulsen isumaqarpoq.

- Isumaqarpunga KNR-ip siulersuisuini siulittaasup nassuiartariaqaraa, sooq pisortaq kingulleq suliunnaarnersoq. Tassami taassuma taama nassuiaateqassalluni pisussaaffigaa, tusagassiortunngorniat ilinniarfianni pisortaq, Naja Paulsen taama oqarpoq.