KNR nutaarsiassaqartitsinermut pisortartaarpoq
Kalaallit Nunaata Radioa nutaarsiassaqartitsinermut pisortartaarpoq.
Pisortanngortoq tassaavoq 36-nik ukiulik Pia Christensen. Taanna NORDJYSKE Medierimi ukiuni kingullerni sulisuusimavoq.
NORDJYSKE Medier tusagassiiviit arlaqartut kattussimasut aallutarivaat. Aviisitigut, radiokkut, TV-kkut, nittartakkatigut, sapaatillu akunneranoortumik aviisitigut tusagassiineq ingerlatarivaat.
Pia Christensen Frederikshavnimi aaqqissuisoqarfimmi ukiuni arlaqalersuni sulisuusimavoq, tusagassiornermik pisortaasarsimalluni, arlalitsigut pikkorissartarsimalluni. Assersuutigalugu ”Kalaallit Nunaat nutaaq”-mik taaneqartumik pikkorissarsimavoq.
Pia Christensenip nunarput nalunngilluarpaa, nunatsinnilu inuiaqatigiinni pissutsinik malinnaalluartuulluni. KNR Radioaviisimi tusagassiortutut sulisimavoq 1998/99-imi.
Pia nunatsinni ilaqutaqarnerarpoq, aappani Ulrik assiliisartuusoq panitsillu marlunnik ukiulik nunatsinnut ilagissavai.
Pia Christensen 1995-imi Danmarks Journalisthøjskolemi tusagassiortutut naammassisimavoq.