KNR nutaaliorsinnaalissaaq
KNR-mut aningaasaliisartut isumaqatigiissusiorfigineratigut naalaartartut isiginnaartartullu KNR-mit tusagassatigut isiginnaagassatigullu pitsaanerusumik periarfissinneqassapput, periarfissallu ukiut tamaasa nalilersorneqartalissapput.
- Illuatungeriilluta tapiisartut uagullu suliassinneqartut suliassanik naammassinnittussat peqqussut nutaaq aallaavigalugu erseqqinnerusumik suliassatsinnik isumaqatigiissusiortalissaagut, taavalu suut naammassineqassanersut erseqqissarneqarpata, piumaffigineqaruttalu uku ukulu piffissap uuma iluani naammassineqassapput, taava tamanna pinngitsoornani aamma KNR-muinnaanngitsoq isiginnaartartunut naalaartartunullu iluaqutaanera qularnanngitsumik takuneqarsinnaajumaarpoq.
KNR-p pisortaa Lars Lennert Sandgreen taama oqarpoq. Kalaallit Nunaata Radioa qassissaalernersumik sunik suliassaqarnera isumasioqatigiiffiusareerluni inatsisartut peqqussutissaat KNR-mut sinaakkusiisussaq tusarnaartunut isiginnaartartunullu pitsaanerusumik periarfissiissasoq Lars Lennert Sandgreenip tusarniarneqartullu assigiinngitsorpassuit qularinngilaat.
Naalaartartut isiginnaartartullu KNR-mut piumasaqarsinnaanerannik kinguneqarpallaassanngilaq, KNR-li nutaaliornissaminut periarfissaqalissasoq, KNR-ip pisortaa Lars Sandgreen oqarpoq.
- Peqquusut imatut sinaakkusiiginnarpoq toqqammavissiiginnarpoq, KNR nutartissagutsigu, uagutsinnut aperisariaqarpugut KNR-iuna sumut atorniaripput, KNR-iuna sutigut naleqqussaqqinniaripput, tassa tassaniippoq ukiut sisamakkaarlugit isumaqatigiissusiornermi sanarfisassat, tassaniipporlu nutaaliorneq.
Taama oqarpoq KNR-ip pisortaa Lars Sandgreen. Sinerissami Takusassiiviit Tusagassiiviillu kattuffiata peqqussutissaq nutaaq aamma isumalluarfigaat, ukiut tamaasa aningaasaliissutit sumut atorneqartarnerat nalilersorneqartalissammat.
Peqqussutissap siullermeerlugu inatsisartut tassuugu oqaluuserissavaat. Per Rosing Petersenip nunatsinni tusagassiornikkut ileqqorissaarnerunissamik oqaluuserisassanngortitaa oqaluuserisassanngortitsisup piumasaqarneratigut kinguartinneqarallarpoq.
