KNR nittartakkatigut nutaarsiassaqartitsinerminik inerisaaleruttorpoq
Aaqqissuisoqarfimmi pilersinneqaqqammersumi sulisut ataasinngormalli sulilereerput. Nutaarsiassaqartitsiviup ittuata Frederik Lundip allannguuteqartoqarnera maluginiareersimavaa:
- KNR.gl-imi nutaarsiassat pitsanngoriareersimapput, siunissamilu suleriaatsit nutaat sungiunneqariartortillugit nittartagaq aqqutigalugu nutaarsiassaqartitsineq suli pitsaaneruleriartussaaq.
Manna tikillugu tusagassiortoq ataaseq radioaviisip nutaarsiassaataanik nittartakkamut immersuisuusimavoq. Immikkut aaqqissuisoqarfiliorneratigut KNR-ip illorsuani nutaarsiassat ataatsimut katersoruminarnerulerput, sukkanerusumillu suleriaaseqartoqalerluni.
- KNR.gl tassaassaaq Kalaallit Nunaanni nittartakkatigut nutaarsiassaqartitsiviit tutsuiginarnerpaartariligassaat. Taanna oqaatsit marluk atorlugit nutaarsiassanik nutaanerpaanik sukkasuumik aallerfiusinnaassaq – ilaatigut nunatsinnit, nunanilu allaniit nutaarsiassanik imaqartassalluni, saniatigullumi naggueqatitta akornanni pisartut arajutsinaveersaartassallutigit. Nittartagaq aqqutigalugu nutaarsiassaqartitsivimmik peqalernitsigut nutaarsiassanik pilertornerusumik saqqummiussisalissaagut, internettillu periarfissai atorluarnerulissavagut, nittartagaq aqqutigalugu nutaarsiassaqartitsivimmi aaqqissuisunngortoq Martine Lind Krebs oqarpoq.
