Kalaallit Nunaata Radioa nutaarsiassaqartitsivimmi pisortaasimasumut Najattaaq Mathiassen-imut nunatta eqqartuussiviani ajorsarpoq.
Nunatta eqqartuussisuunerata Søren Søndergård Hansen-ip nassuiaataani allaqqavoq Najattaaq Mathiassen-i 125.000 koruuninik taarsiiffigitissasoq. Tamatuma saniatigut eqqartuussinerup ingerlanerani aningaasartuutit KNR-imut akiligassanngortinneqarput.
Nunatta eqqartuussisuunerata nassuiaataani naqissuserneqarpoq nutaarsiassaqartitsivimmi pisortaasimasumik soraarsitsineq tunngavissaqanngitsoq.
Najattaaq Mathiassen-ip nassuiaat suli atuarsimannginnerarpaa, aalajangiinerli nuannaarutigaa oqiliallaatigalugulu.
Kalaallit Nunaata Radioata pisortaanerata Lars Lennert-Sandgreen-ip aalajangiineq oqaaseqarfigerusunngilaa. Pisoq pillugu aqagu aatsaat oqaaseqarumavoq KNR-imi siulersuisut paasitinneqaqqaassammata.
Eqqartuussiveqarfiup nassuiaataa illuatungeriinnit akueriumaneqanngippat aalajangerneq eqqartuussissutaassaaq, taamaassappallu eqqartuussut suleriareqqitassanngortinneqassalluni.