Taassumali taama oqarnini nipilersortartuinnartut Kattuffiullu avataatigut oqaaseqarnertut erseqqissaatigaa.
- Nuummi pinikut taakkua annerusumik pineqarpallaartarput, sinerissami aaqqissuusisartoqarpoq aanmma suleqatigineqarsinnaasunik, soorlu; Nipiaa rockfestivali ukiut tamaasa ingerlanneqartarpoq tusarnaartitsinernillu nuannersorsuarnik aaqqissuisarsimaqaluni. Aamma nalunngilara nunaqarfiit ilai peqatigiiffeqarnermikkut tusarnaartitsisartut, Leif Immanuelsen oqarpoq.
Leif Immanuelsen aamma isumaqarpoq nipilersortartut suli cd-mik saqqummiussisimanngikkaluarlutik nipilersullaqqilluartut kajumissaaserneqarsinnaagaluartut.
- Aamma cd-mik saqqummiussisimanngikkaluartunik nipilersoqatigeeqarsimassagaluarpoq kajumissaarserneqarsinnaasunik, immaqalu akissarsiassaqartillugit studiami immiussisinnerisigut saqqummernissaannik periarfissineqarlutik, Leif Immanuelsen oqarpoq.
Telefonikkut taaseriaaseq Leif Immanuelsenip aamma isornartoqartippaa.
- Telefonikkut qanorsuaq taaguisoqarsinnaavoq killeqanngitsumik siorna aamma taasisitsisoqarmat inuit 70.000-t sinnillit taasisimapput, uffalu nunarput 56.000-iinnarnik inoqaraluartoq, tamakku ippinnarsinnaapput, Leif Immanuelsen oqarpoq.
Sermitsiamili takusimanerarpaa KNR music Awardsimik aaqqissuisut tamatuminnga ilisimaarinninnerminnik oqaaseqarsimanerat iliuuseqarfigineqanngitsorli.
Leif Immanuelsen aamma oqarpoq KNR-ip immikkoortortaqarfii KNR avannaa kujataalu suleqatiginerisigut siammasinnerusumik angusaqartoqarsinnaagaluartoq.
KNR Music Awardsimik aaqqissuisoq Kurt Egede oqarpoq. Telefonikkut qarasaasiakkullu taasinerit immikkoortinneqartartut siornalu pisoq assersuutigigaanni telefonikkut taasisut 30.000-iusimasut qarasaasiakkullu taasisut 40.000-iusimallutik taamaalillutik 70.000-inngorlutik.
Kurt Egede aamma erseqqissaavoq ajornartorsiutit pineqartut ilisimaarigitsik.