KNR-mik misissuineq naammagisimaarpaat
- Qulequtaq tamanna nutaajunngilaq, tamannalu siulersuisuni eqqartortareerparput pissusissamissullu isigalugu siulersuisuni ilaasortat suminngaaneerfii eqqartoqqinneqartariaqartut, KNR-ip siulersuisuini siulittaasoq, Hans Peter Poulsen oqarpoq.
Naalakkersuisut misissuisitsineranni suliaqartup, Epinion-ip nalunaarusiaminni innersuussutigaat, KNR-ip siulersuisuini aningaasarsiutigalugu siulersuisunik ilaasortaqartariaqartoq, tamannalu KNR-ip aningaasarsiornerata siumut aallartinnissaanut aqqutissaasoq innersuumminni allaaseralugu.
Siulersuisut nukittorsarneqarneranni eqqartoqqinneqartariaqartut ilagigaat, illoqarfiit TV-qarfiinit radioqarfiinillu KNR-ip siulersuisuini ilaasortaatitaqartarneq, Hans Peter Poulsenip oqarpoq.
- Assersuutigalugu sinerissami TV-qarfiit radioqarfiillu KNR-imut sullissisuusarput, taamaattumillu taakku aningaasarsiornissartik KNR-imillu attartorneqarnissartik soqutigisaralugu, KNR-imi pissutsinut aalajangeeqataasarlutik. Tassa tamanna apeqqusersorneqarsinnaasoq eqqartorneqarlunilu ilumut pissusissamisoornersoq, Hans Peter Poulsen oqarpoq.
Epinionip misissuinerata inernera, Kultureqarnermut Naalakkersuisup, Mimi Karlsenip atuareerlugu tupaallannartortaqartinngilaa.
- KNR piffissami sivisuumi Naalakkersuisuni eqqartortarparput naatsorsuutinullu tunngasut suliariuarlutigit, taamaammat immikkuullarissumik tupaallannartumillu misissuisitsinermit tusagaqanngilanga, Mimi Karlsen oqarpoq.
Epinionip misissuinermini paasisaasa ilagaat, Namminersorlutik Oqartussat KNR-imut aningaasaliissutigisagaat, ukiumut 65 million koruuniusut, KNR-imi sulisut aningaasarsiarisartagaannut malinnaatinneqarsimanngitsut.
Mimi Karlsen aperaarput, KNR siunissami aningaasanik amerlanernik pisalissanersoq, Mimi Karlsenili toqqaannartumik neriorsuinngilaq KNR-imut aningaasaliissutit amerlineqassanersut.