KNR-mi soraarsitsiortortoqarpoq

KNR-imi siulersuisut ulluinnarnilu aqutsisut ullumi nalunaarutigaat atorfiit aqqanillit sipaarutigineqartut.

Ullumikkut KNR-mi nikallungasoqarpoq siulersuisuni siulittaasoq Hans Peter Poulsen aamma pisortaq Ivalu Egede nalunaarmata suliffeqarfik taanna Namminersorlutik Oqartussat ingerlataat sipaarniartariaqalersoq.

Tamatuma kinguneranik atorfiit aqqanillit atorunnaassapput.

KNR 2009-mi 110-nik aalajangersimasumik atorfeqartunik sulisoqarpoq, sulisullu ullumikkut 94-upput. Sipaarniarnerup kingorna sulisut 83-iinnanngus­sapput.

- Taama sakkortutigisumik iliuuseqartariaqarnerput ajuusaaru­tigeqaarput. Ikilisaanerit, maanna ingerlanniakkagut, radiokkut tv-kkullu aallakaatitassiat ikilinerannik kinguneqanngitsoornavianngillat. Sipaarniarnertaaq najukkani tv-qarfinnut radioqarfinnullu sunniuteqassaaq, taakkumi 2012-ip sinnerani isertitassaminnik annaasaqas­sapput. Aamma sulisut tatiginartut pikkorissullu arlariit KNR-imut atalluinnartut inuulluaq­qusariaqassavagut, KNR-mi pisortaq Ivalo Egede oqarpoq.

Sulisut ikilinerat demokratimut aamma sunniuteqarnerlussaaq. Isornartorsiuisumik tusagassiornissaq ajornakusoornerulissaaq sulisut ikilinerisa kinguneranik.

- Arsaq piginnittunit sivisuumik tigummineqars­imavoq, Namminersorlutik Oqartussallu qisuariarnissamut periarfissaqarsimapput. Matumani sipaarniarnerup kingunerisassai pillugit piginnittut ilisimatereerpagut, KNR-imulli aningaasa­tigut tapiisoqaqqinnissaa iluatsissimanngilaq. Alloriarnerit tullissaat tassaassaaq innuttaasunik kiffartuussinissamik isumaqatigiissummut tunngatillugu naatsorsuutigineqartut ukiunut aggersunut naligiissarnissaat, neriuutigaarali siunissami aallakaatittakkatigut pitsaasunik imaqartitsinissamut aningaasanik suli amerlanerusunik pisariaqartitsisoqarnera politikkikkut paasinniffiujumaartoq, KNR-mi siulersuisut siulittaasuat Hans Peter Poulsen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat