KNR-mi danskisut nutaarsiassat ikilisinneqassanngillat
Tusagassiornikkut pissuserinnissamik ileqqorinnissamillu ineriartortitsinissaq pillugu Siumumeersup Per Rosing Petersenip oqallissaarutaa Inatsisartuni ualimanna oqaluuserineqarmat, ilanngullugu kalaallisuinnaq tusagassiisalernissamut tunngasoq oqaluuserineqarpoq. Isummersuulli inatsisartunit ilaasortanit amerlanerussuteqartunit ilalerneqanngilaq. Akerliusunut aamma ilaapput, kalaallit danskisuinnaq oqaasillit peqatigiiffiat.
- Kalaallisuinnaq tusagassiisoqartalernissaannik isummersuut iluarivallaanngilara, danskisuinnaq oqaaseqartuullunga nutaarsiassatigut malinnaasinnaanissara killeqalissammat. Jeanette Holding nassuiaavoq.
Jeanette Holding aamma isumaqarpoq, tikisitat matumani puigorneqannginnissaat pingaaruteqartoq.
- Pinngitsoorsinnaanngilavut, pitsaanerpaamik suliamik tunniussissagunik inuiaqatigiinni pisut aamma ilisimasariaqarpaat. Jeanette Holding erseqqissaavoq.
Savalimmiuni nutaarsiassat tamangajammik savalimmiormiutut ingerlanneqartarput, danskisullu annikitsuinnarmik nutaarsiassaqartitsisoqartarluni. Periuseq tamanna Per Rosing Petersenip oqallissaarinermini ilaatigut tikkuarpaa. Taamaliornissamulli maanna piffissaanngitsoq Jeanette Holding isumaqarpoq.
- Imaaliallaannaq allanngortitsiniartoqarsinnaanngilaq, savalimmiormiut nunatsinnut naleqqiullugit oqaatsit pillugit politikkimik qangaaniilli ingerlataqareersimapput. Aamma uagutsitulli tikisitanik atuinissaat qularaara, isumaqarpungalu nunatsinni suli ukiorpassuarni tikisitsisarnissatsinnut pisariaqartitsissasugut. Jeanette Holding oqarpoq.
Inatsisartuni partiinut paasiniaanitsinni paasinarsivoq, Atassut, Demokraatit aamma Inuit Ataqatigiit isummersuutinut isumaqataanngitsut.
Inuit Ataqatigiinneersoq Kuupik Kleist ima tunngavilersuivoq.
- Oqaatsit kalaallisut danskisullu atukkavut atorlugit nutaarsiassalerineq tamatigut annertusartariaqarpoq. Internetikkut, radiokkut, tv-kkut, tekst-tv-kkullu annertusaasariaqarpoq, inuiaqatigiinni kalaallini innuttaaqataasut tamarmik annerusumik paasisaqarniassammata. Taamatuttaaq inuiaqatigiit ingerlanneqarneranni peqataanissaminnut annertunerusumik periarfissaqarniassammata. Kuupik Kleist tunngavilersuivoq.
Kuupik Kleistip erseqqissaatigaa, Per Rosing Petersen isumaqatiginngikkaluarlugu tamakkununnga tunngasut isertuanani oqallisiginissaat aamma pitsaasoq.
- Imaassinnaavoq, tusagassiorfinni kalaallit oqaasiisa atorneqarnerat naammaginngikkaa, tassuuna paasisinnaavara. Kisianni tassanngaannit oqassalluni, taava allat oqaasii piiarneqassasut, tassuuna isumaqatiginngilara. Kuupik Kleist oqarpoq.
Siumut kalaallisuinnaq tusagassiisalernissamut isuma partiinit kisiartaalluni ilalerpaa, kalaalinngorsaanermut tunngassuteqarmat iluarisimaarnerarlugu.
