KNR-ip radiukkut tv-kkullu aallakaatitsisarneq pillugu inatsisinik paasinninnginnera USA-mit inatsisinik unioqqutitsilluni taperneqarneranut pissutaasoq inatsisilerituumit nalilerneqarpoq.

KNR-ip unioqqutitsisumik taperneqarnermut suliamut atatillugu USA-mi angalanerminit ilanngutassiat tamaasa peerai

KNR-ip radiukkut tv-kkullu aallakaatitsisarneq pillugu inatsisinik paasinninnginnera USA-mit inatsisinik unioqqutitsilluni taperneqarneranut pissutaasoq inatsisilerituumit nalilerneqarpoq.

KNR-ip USA-mit taperneqarluni tusagassiortunik marlunnik USA-mut siorna oktobarimi ilanngutassioriartortitsigami tv-kkut radiokkullu nutaarsiassanik aningaasalersuinermut inatsit unioqqutippaa.

Ilinniartitaanermut, kultureqarnermut ilageeqarnermullu naalakkersuisoqarfik sisamanngormat unnukkut taama aalajangiivoq. Tamatumunngalu atatillugu KNR angalanermit nutaarsiassat ilanngutassiallu, Qanoruukkut radioaviisikkullu aallakaatinneqartut, tamaasa peernissaannik peqquneqarpoq.

KNR-ip taama aalajangiineq tusaatissatut tiguaa, aningaasalersuinermullu malittarisassat sukatissallugit. KNR-ip pisortaa Karl-Henrik Simonsen taama paasissutissiivoq.

- Uani piumasarisaavoq, taamaallaat radiokkut tv-kkullu aallakaatitassiat peerneqarnissaat. Kisianni innuttaasunut oqariartuuteqarusulluta aamma nittartakkatsinni allakkiat piissavagut, apeqquserneqarsinnaassanngimmat, massakkut siunissamilu, KNR-ip pituttorsimanani sulisinnaanera, Karl-Henrik Simonsen oqarpoq.

Allaaserisat nittartakkakkut saqqummersinneqartut tv-kkut radiokkullu aallakaatitassianut aningaasalersuinermut inatsimmut ilaanngilaq.

Aalajangiineq: KNR inatsisinik paatsuugaqarsimavoq

KNR-ip ilanngutassioriartortitsigami inatsisinik unioqqutitsinissaq siunertarerpasinngikkaa, inatsisilli paatsoorsimagai, aalajangernermi allaqqavoq.

- KNR inatsisinik pineqartunik qaangiiginnarnissamik siunertaqanngitsoq, taamaattumillu inatsisinik paatsuuisimavissoq, suliami maannamut paasissutissat, pingaartumik KNR-ip suliamut atatillugu paasissutissiinera, tunngavigalugit naalakkersuisoqarfik naliliivoq.

- Inatsisinik qaangiiginnarnerup inatsisitigut tunngaviusunut attuumassuteqartunut paasinninnginnermik pissuteqarpasinneranik taama naliliinermut pissutaavoq, aalajangiinermi allaqqavoq.

AAMMA ATUARUK Namminersorlutik Oqartussat: KNR USA-mut angalanermini tapiissuteqarfigineqarnermini inatsimmik unioqqutitsivoq

Inatsisinillu paasinnissimanani paasitinneqarluni nuanninngitsoq, Karl-Henrik Simonsen oqarpoq.

- Tamanna siunissamut ilikkagaqarfigiinnartariaqarparput, pisortaq oqarpoq.

§ 48-mi ima allaqqavoq:

  • Aallakaatitassianut aningaasalersuisarnerup iluaniipput radiukkut tv-kkulluunniit aallakaatitassianut, tassunga ilaallutik tekst-tv-mi imaluunniit internetikkut elektroniskiusumilluuniit periarfissat allat atorlugit takutitanut toqqaannartumik toqqaannanngitsumilluunniit tapiissutit suulluunniit, inuup ingerlatsiviulluunniit aallakaatitsinermik aallakaatitassiornermilluunniit ingerlataqartuunngitsup, atermi, ilisarnaatimi (logo), kinaassutsimi, ingerlatami nioqqutissiamiluunniit ilisimaneqarnerulernissaat siunertaralugu aningaasaliiffigisai.

§ 48-mi imm. 6-imi ima allaqqavoq:

  • Aallakaatitassiat nutaarsiassanik maannarpiarlu soqutiginartunik imallit aningaasalersorneqaqqusaanngillat.

Paasissutissat: Radiokkut tv-kkullu aallakaatitsisarneq pillugu Inatsisartut Inatsisaat nr. 7,8. juni 2014-imeersoq

KNR-ip pisortaa Karl-Henrik Simonsen KNR-ip pisortaa Karl-Henrik Simonsen

Tusagassiortut KNR-ip nutaarsiassaqartitsiviani taamani atorfeqarput. Ulluni aqqaneq-marlunni angalapput, USA-llu nunanut allanut tunngasunut ministereqarfiata timmisartornissamut billetit akunnittarfimmiinnissarlu akilerpai.

Kalaallit USA-mi najugaqartut, inuussutissarsiorfinni sulisut USA-milu oqartussaqarfinneersut tassani apersorneqarput.

KNR-ip USA-mit taperneqarnera videoliortartup Qarsoq Høegh-Damip KNR USA-mit akilerneqartutut videoliamini minutsinik qulinik sivisussuseqartumi, inuit internetikkut attaveqaqatigiiffiitigut saqqummersitamini, isornartorsiorpaa.

USA nunatsinni angusaqarniarsarisoq taassuma erseqqissaatigaa.

KNR-ip pisortaa: Arlaannaannulluunniit attuumassuteqarnata nutaarsiassiisarpugut

KNR-ip angalanermini suliai USA-mit sunnerneqassanngitsut aallannginnermi qulakkeerneqarpoq. KNR-ip angalanermit saqqummersitsinissaa USA-miut kisimi piumasaraat. Saqqummersinneqartut qanoq amerlatigissanersut qanorlu sivisussuseqassanersut pillugit piumasaqaateqanngilaq.

Taamali suli taperneqaqqusaanngitsoq, ilinniartitaanermut, kultureqarnermut ilageeqarnermullu naalakkersuisoqarfiup erseqqissaatigaa.

USA ilanngutassianut sunniuteqanngikkaluartoq, oqartussaasunit tapiisoqaraluartoq, angalanermilu tusagassiornermik suliaqarnissaq salliutinneqaraluartoq, taama taperneqarneq inatsisinik unioqqutitsinerusoq, inatsisilerinermut siunnersortit pisortaat allappoq.

AAMMA ATUARUK Nyhedschef om mulig ulovlig rejse-støtte: Vi skal lære af det i fremtiden

- Tamatumunnga atatillugu ilanngunneqassaaq, tusagassiuinissamut angalanerup USA-miinnerullu aningaasaliiffigineqarnerata immini tusagassiuineq arlaannaannulluunniit ilumut attuumassuteqannginnersoq pillugu apeqqusiisoqarsinnaatilerpaa, aalajangiinermi allaqqavoq.

- Tassalu tamanna tusagassiuineq arlaannaannulluunniit attuumassuteqannginnersoq pillugu apeqqusiisoqarsinnaaneranut naammappoq, tamaattoqarsinnaannginnissaalu nutaarsiassat maannarpiarlu soqutiginartut pillugit aallakaatitassiat aningaasalersuinissamut inerteqquteqarnermi tunngaviuvoq, allakkami allaqqavoq.

KNR USA-mit pisiarineqarsimasutut angalanerup kingorna isornartorsiorneqarpoq. Karl-Henrik Simonsenili naapertorlugu taamaattoqanngilaq. KNR-imi arlaannaannulluunniit attuumassuteqanngitsumik isornartussarsiortumillu tusagassiuisoqartartoq taassuma oqaatigaa.

- Pituttorsimanata qulangersimaneqarnatalu oqartussaatitaanerput nutaarsiassiigaangatta tunngaviusumik aallaaviusuaannarpoq. Tamanna qulakkeerneqareerpoq, aamma ullut tamaasa qulakkeerneqartarpoq, Karl-Henrik Simonsen oqarpoq.

KNR-ip siulersuisuisa KNR-ip akeqanngitsumik angalasimaneq ineqartinneqarnerlu akuerisimammagu ilungersunartutut isigaat. Malittarisassanik unioqqutitsineruvoq, siulersuisut siulittaasuat Sofie Sandgreen oqarpoq, ilanngulluguli oqarluni siulersuisut suli tatiginnittut. 

- Siulersuisut erseqqissaatigissavaat KNR-ip qullersaqarfia, nutaarsiassaqartitsivia aaqqissuisoqarfiillu tatigilluinnaratsigit, taakkulu tatiginassusaat innarlerneqarsimanngitsutut isigigatsigit, Sofie Sandgreen allappoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat