KNR-ip pisortarisimasaa Tele-Postimi taartaagallartoq

Søren Lennert Mortensen ukiorpaalunni Namminersorlutik Oqartussat suliffeqarfiutaanni assigiinngitsuni pisortaasarsimavoq, ilaatigut Fillatelimi pisortatut, KNI-milu pisortaanertut, kingullertullu KNR-imi pisortatut.

- Tele-Posti ingerlalluartoq Kalaallit Nunaannut pingaaruteqaqaaq, taamaattumik attavigineqarama aperineqarlungalu ikaarsaariarnerup nalaani sulisinnaanersunga nalornisiginngilluinnarlugu akuersivunga. Pilersaarutigisimasaraluaralu qaammatialunnik kinguartikkallartariaqarpara, Søren Lennert Mortensen oqarpoq. 

Aamma atuaruk Tele-Postimit tunuarniartut pillugit oqaaseqarusuttoqanngilaq

Aamma atuaruk TELE-POST-imi aqutsisut siulersuisullu suleqatigiinniarnikkut uteqqiattumik ajornartorsiortarsimasut

Tele-Postimi pisortaanermik atorfinitsisoqarnissaa februaarimili sulissutigineqalerpoq, pisortaanertullu qaammatini tulliuttuni atorfinitsitsisoqarsinnaanissaa naatsorsuutigineqarluni.

Tele-Post, suliniutinik assigiinngitsunik pingaarutilinnillu qaammatini makkunani ulapputeqaleruttorpoq. Tassa nalunaarasuartaateqarnermik ammanerulersitsineq, ingerlatseqatigiiffiup qitiusumik IT-mut atortoqarfianik taarsersuineq, imaatigullu kabelimik sakkortusaavimmillu avannamut talliliinissamut piareersaaneq aningaasalersuinerlu.

Suliassat qulaani taaneqareersut Tele-Postimik nutaanik annertuunillu piumasaqaateqartoq, minnerunngitsumik qullersanut:

- Pisortaagallartussamik pisariaqartitsinerput paasigatsigu Søren Lennert-Mortensen eqqaaqqaarsimavarput, siulersuisunilu qujamasuppugut Søren Lennert-Mortensen akuersimmat. Piffissami piumasaqarfiullunilu ilungersunartorsiorfiusumi aqutsinikkut misilittagaqarnerujussuit Kalaallit Nunaanni pissutsinik ilisimaqarnerujussuit siuttuunissamut tulluarluinnarput, Tele-Postimi siulersuisut siulittaasuat Agner N. Mark, tusagassiuutinut nalunaarummi ilaatigut taama allaaserisaqarpoq.

Søren Lennert-Mortensen, pisortaanerugallartutut ingerlaannartumik sulilissaaq.