KNR-ip pisortaa: Killiligaanani tusagassiisarneq Naalakkersuisut innarlersinnaavaat

Tusagassiorfimmi pingaarutilimmi siulersuisut politikeriniit toqqarneqatartarniarpata, tamanna navianarpoq, KNR-ip pisortaa Søren Lennert Mortensen taama isumaqarpoq. Ilanngullugulu taassuma erseqqissarpaa, Naalakkersuisut pikkorissunik toqqanngikkunik, killiligaanani tusagassiorsinnaaneq innarlerneqarsinnaammat.
februaarip 18-at 2014 06:03

SIK-p siulittaasuata Jess G. Berthelsenip aamma aarleqqutigaa, pissaanerit sisamaat, tassa nunami oqartussaaqataalluni inuuffimmi killeqanngitsumik tusagassiisinnaaneq, Naalakkersuisut siulersuisunik nammineq toqqaasalerpata tamanna innarlerneqarsinnaammat.

Kalaallit Nunaannilu Sulisitsisut peqatigiiffiata, GA-p pisortaata, Brian Buus Pedersenip oqaatigaa, Naalakkersuisut KNR-i imminut pigisunngortikkunikku pitsaanerussagaluartoq.

KNR-imi siulersuisut arfineq-marluujunnaarlutik tallimaannagortinneqarnissaat Naalakkeersuisup Nick Nielsenip siunnersuutigaa. Siulersuisunilu tallimaasuni sisamat Naalakkersuisunit toqqarneqartarnissaa aamma siunnersuutigaa.

KNR-ip pisortaa Søren Lennert Mortesen, radioaviisimut oqarpoq, Naalakkersuisut eqqarsaataat silatusaarnerugaluartoq, kisianni kikkut toqqarneqarnissaannik Naalakkersuisut eqqarsarluartariaqartut, Søren Lennert Mortensenip oqaatigaa.

-Siulittaasunut ilaasortassat politikerit aaliangertalissappassuk tamanna tusagassiorfimmut pingaarutilimmut aarlerinarsinnaavoq. Ajornakusoorsinnaavoq, pissutigalugu suliffeqarfimmik aqutsinissaminnut piginnaasaqarnertik pissutigalugu politikererpalaartumik siulittaasussat toqqarneqartalertussaagamik. Ataatsimut isigalugu mianersortumik siulittaasussanik toqqaasoqanngippat, killilimmik tusagassioriaaseqartoqalersinnaavoq, Søren Lennert Mortensen taama oqarpoq.

Aamma SIK-p siulittaasuata Jess G. Berthelsenip aarleqqutigaa, pissaanerit pingajuat, tassa tusagassiorneq, nunami oqartusaaqataaffimmi atugaasoq, politikerit nammineq siulersuisunik toqqaasalernerisigut innarlerneqarsinnaammat.

- Aarleqqutigineqarsinnaavoq KNR-ip aammalumi tusagassiortut Naalakkersuinikkut aqunneqalersinnaaneri, tamanna pinngitsoortinniarneqartariaqarpoq tassami tusagassiortut pissaanerup sisamaattut oqaatigineqartarput. Taamaattumik arlaannaannulluunniit pituttorsimannginnissaat pingaaruteqarpoq, Jess G. Berthelsen oqarpoq.

Kalaallit Nunaanni sulisitsisut peqatigiiffiata, GA-p siulittaasuata Brian Buus Pederseni oqaatigaa, Naalakkersuisut KNR-i imminut pigisunngortikkunikku pitsaanerussagaluartoq.

- KNR-ip siulersuisuisa pitsanngorsarneqarnissaannik isuma ajunngivippoq. Kisianni eqqarsaatigineqartariaqarpoq, KNR-i tusagassiornermik suliaqartuuvoq, taamaattumillu siulersuisut katitigaanissaannik periuseq alla toqqarneqartariaqaraluarluni, soorlu siornatigut eqqarsaataasimasoq, tassa KNR-ip imminut ingerlattunngorneratigut aaqqissuussilluni.

Kalaallit Nunaanni sulisitsisut peqatigiiffiata siulittaasua Brian Buus Pedersen oqarpoq.