KNR-ip nutaarsiassaqartitsinermut pisortarisimasani taarsiiffigisussanngorpaa

KNR-imi nutaarsiassaqartitsinermut pisortaasimasup Najattaaq Mathiassen-ip KNR-imik eqqartuussisunut suliassanngortitsinera naammassineqarpoq, tassanilu landsrettimi aalajangerneqarpoq Najattaaq Mathiassen pissutissaqanngitsumik tunngaveqarluni atorfianit soraarsitaasimasoq tamannalu pillugu KNR Najattaaq Mathiassen-imut aningaasanik taarsiisariaqartoq.

Najattaaq Mathiassen-ip KNR-imi nutaarsiassaqartitsivimmi pisortatut atorfimminit tunuartinneqarnera tunngaveqarpoq siornaak 2003-mi decembarip arfernanni julefrokosternerup nalaani pineqartoq, KNR-mi sulisumut allamut annersaasimasutut pasillugu politiinut unnerluutigineqarmat.

Najattaaq Mathiassen-ip politiinut unnerluutigineqarnera kinguneqanngilaq politiinut tunniussisoq pisut pillugit aalakoorpallaarnini peqqutigalugu eqqaamasaqarsinnaasimanngimmat, AK Atorfillit Kattuffiat taama nalunaarpoq.

Najaattaaq Mathiassen-imik soraarsitsinini KNR-ip aalajangiussimasimavaa, tamatumalu kingorna soraarsitsineq Qanoruukkut Radioaviisikkullu aamma saqqummiunneqarpoq.

- Suliaq eqqartuussisunut suli anngutinngitsorluunniit Najattaaq Mathiassen suleqatigisimasaminit KNR-milu pisortanit pisuutinneqarpoq, AK allappoq.

Tamatuma kingorna Atorfillit Kattuffiata Najattaaq Mathiassen sinnerlugu KNR eqqartuussisulersuuppaa, pissutissaqanngitsumik soraarsitsisimanerarlugu Najattaaq Mathiassen-imullu 200.000 koruunik tamatumalu saniatigut suliap eqqartuussivimmut suliassanngortinneraniit suliaq naammassippat aningaasat tunniunneqarfissaata tungaanut ernianik akileeqqullugu.

Landsrettimi suliaq ukioq manna maajimi ingerlanneqarpoq, tamatumalu kingorna Landsretti nalunaarpoq Kalaallit Nunaata Radioata Najattaaq Mathiassen-imik soraarsitsisimanera tunngavissaqarsimanngitsoq.

Tamatuma kingorna KNR Landsrettimut qinnuteqarpoq suliap eqqartuussinikkut naammassineqarnissaanik. Juulip 20-iani eqqartuussineqarmat KNR Najaattaq Mathiassen-imut katillugit 150.500 koruuninik taarsiisussanngortinneqarpoq.

Najattaaq Mathiassen-ip KNR-mik eqqartuussisulersuussinera Østre Landsrettimut suliamik ingerlatitseqqiinermik kinguneqassanngilaq.