KNR-ip nipilersukkanik nalunaarsuisarnera misissulerpaa
Ukiup kingulliup ingerlanerani erinniortut taalliortartullu arlallit KNR-ip nalunaarsuisarneranik naammaginninnginnertik akuttunngitsumik oqaatigisarpaat, tamatumami kinguneranik nipilersortartut aningaasanik pissaraluaminnik tunineqanngitsoortarmata.
Koda maanna aalajangerpoq, 2007 tamakkerlugu kiisalu 2005-imut 2004-mullu nalunaarutigineqartartut, isornartoqartutut isigisatik, misissuiffiginiarlugit.
KNR-ip pisortaata Lars Lennert Sandgreenip nipilersortartut pisassaraluinik tunineqanngitsoortarnerannik oqarneq siusinnerusukkut tunngavissaqannginnerarpaa.
- Tamanna ingasaassineruvoq. Siusinnerusukkut nalunaarutigisimasatsitut ullormut nalunaarsuisarnitsinni ajornartorsiuteqarsimavugut, kisianni tamatuma kingorna pissutsit tamakkua Kodamut tunngasut sukateriffigaavut, Atuagagdliutinut taama oqarpoq.