Tusarnaartartut isiginnaartartullu aallakaatitat ajorseriarnissaannut aarleqqutissaqanngillat. Kalaallit Nunaata Radioata Naalakkersuisullu anguniagaqarnissamik isumaqatigiissutaata nutarsarnissaa pissusissamisuuginnarpoq, KNR-imi siulersuisut siulittaasuat Juaaka Lyberth oqarpoq.
- Tamannaana aaqqiiffiginiarlugu oqaloqatigiinnerit ingerlateqqikkigut aamma taleqarluta oqaloqatigiinnerit ingerlappagut. Siunertaanngilaq sullissinerup ajornerulersinniarnissaa. Neriuutigaarput sullissineq ajunnginnerusumik ingerneqarumaartoq oqaloqatigiinnerit ingerlalluarpata, Juaaka Lyberth oqarpoq.
KNR-ip Public Service, tassa innuttaasunik sullissivittut ineriartortinneqarnissaa pillugu isumasioqatigiinnissaq tusarniaasoqarnissarlu novembarimi pissaaaq.
- Tusagassiuuteqarneq pillugu tusarniaatitsinissarput aallartikkutsigu pissutsit sukumiisumik qaqilerneqarsinnaasut aamma siunissami pitsanngorsaatissat suut takorloorneqarnersut suullu anguniarneqarnersut eqqartorneqassapput. Taamaattumik siulersuisuni sulinitsinni sullissinerput ajornerulersinniarlugu siunertaqanngilagut. Sullissinerput-una suli pitsanngorsarniarlugu taamatut suliniuteqartugut, KNR-p siulittaasua nangippoq.
Juaaka Lyberthip erseqqissaatigaa naalakkersuisunut anguniagaqarnissamik isumaqatigiissutaanik isumaqatigiissutip nutarternissaa pillugu juunimili nalunaaruteqareersimallutik, KNR-illu allakkiaa taassuminnga avammut nalunaarnerinnaanerarpaa. Naalaartartut isiginnaartartullu aamma ernumasariaqannginnerarpai.
- Isumaqarpunga pissutsit qanoq ittuuneri KNR eqqarsaatigalugu politikerinut kikkunnulluunniit tupassutissaanngikkaluartoq. Sukumiisumik nassuiarluarneqarsimasunik assigiinngitsorpassuarnik paasissutissanik uagut siulersuisut atuuffitsinni politikerit tuniorartuarsimagatsigit, KNR-ip siulersuisuini siulittaasoq Juaaka Lyberth oqarpoq.