KNR-ip illutoqaa atorunnaarluni qimanneqarpoq
- Tassa illu taanna atorunnaavissaaq. Illu ukiorpassuarni atorluarneqarpoq. Ukiut ingerlanerini KNR-imi sulisarsimasut pissanganartumik ulapinnartumillu tassani suliffeqarsimapput, KNR-ip pisortaanera Søren Lennert Mortensen taama ilisimatitsivoq.
Qulimiguulinnut inissiisarfiusimasoq Kissarneqqortuunnguamiittoq oqummik eqqugaanermi kingorna annaanneqarsinnaajunnaarsimavoq maannalu isaterneqartussanngorluni. KNR tusagassiuuteqarfiup nutaap sumi inissisimanissaanik aalajangertoqarnissaata tungaanut Issortarfimmut 1-imi 9-milu inissisimavoq.
Issortarfimmut 9-mut sapaatip akunnerani uani studia kingulleq nuunneqasaaq, ininut nutaanut. Nutsernerup kingunerisaanik TV-kkut ullaap tungaani aallakaatitsisarnerit sivikitsumik uninngagallassapput. Qanorooq aallakaatitsiffiugallartumiit aallakaatinneqartassaaq.
Pisarnerminit Qanorooq sivikinnerussaaq ajoraluartumillu immiuteriigaassalluni, KNR-ip pisortaanera Søren Lennert Mortensen taama ilisimatitsivoq.
Maajip qaammataata qiteqqunnerani ininut iluamik inissereersimanissani KNR-ip naatsorsuutigaa.