KNR-ip illorsua ullumimiit qimaneqarpoq

KNR-imi aallakaatitassiorneq tamarmi tv-p illorsuani ingerlanneqalermat, KNR-ip illorsuanngua ukiut 50-ingajaat sullivioreerluni ullumi qimannera malunnartinniarneqarpoq. Sulisut sulisuusimasullu qaaqqusaasunut ilaapput, Peter O. Petersen Kaj Olsen-ilu nipilersortoralugit. Siulersuisuni siulittaasoq Pollas Lyberth oqalugiarluni aallartippoq.

Oqalugiareerneranilu ukiorpassuarni sulisuusimasut eqqaaniarlugit minutsinik marlunnik nipaallisimasoqarpoq.

Illorsuannguup ukiuni 47-ni atuunnermini inuppassuit illumut attuumassuteqarsimapput, eqqaamasallu amerlaqaat qimanneralu sulisutoqqanik ungagineqaqaluni.

Nipinut nuannarineqarluartunut ilaapput Hjalmar Berglund ukiut 30-ssaat KNR-ip illorsuani sulisuusoq, Carla Davidsen-ilu ukiut 29-ssaat sulisoq, sullivitoqannguartik qimaleramikku ungageqaat.

-Qimalerlugu unganaraluaqaaq. Manna illu nuannersorparpassuarnik aammalu oqimaatsorpassuarnik misigisaqarfiginikuuarput ilinniarfigingaatsiarnikuullugulu. Manna illu uagutsinnut perorsaaffiungaatsiarsimasoq qimalerlugu soorlu qamuuna pigisaq qimalerlugu, nassarsinnaanagu, qiasunngunangajapporluunniit, Hjalmar Berglund oqarpoq.

-Makkua iikkat oqaluttuarsinnaasuugunik sunarsuarmitaava sunannguarlu oqaluttuarisinnaagaluarpaat. Inuppassuit assigiinngitsorpassuit ineriartortitsisimapput maani illutoqannguami. Ilai qimagutereerput, ilaat suliunnaarput utoqqalinertik pissutigalugu. Anersaap maaniinnerra uanga iperaruminaatsissavara, neriuppungali nutaamut nuukkutta, taanna anersaaq nassarumaaripput, naak ilamininngua maanga qimakkaluarlutigu, Carla Davidsen oqarpoq.

Radio-p illorsua 1958-mi atulerpoq, ukiullu 47-it atuulluni. Namminersornerullutik oqartussanit ullumimiit tigummineqalerpoq.