KNR: Imminut pigisutut ingerlanissamut isuma nutaajunngilaq

KNR-ip imminut ingerlattutut inissisimalernissaannik Josef Motzfeldt-ip IA-meersup siunnersuuteqarneranut atatillugu KNR-ip siulersuisuini siulittaasup Frederik Lund-ip Josef Motzfeldt KNR-ip siulersuisuinut saaffiginninnissaanik kajumissaarpaa.
Allattoq Jaaku Lyberth
maajip 14-at 2008 05:18

KNR-imi siulersuisut inatsisartunik ilaasortanik isumaqatiginninniassappata tamanna Frederik Lund-ip tulluartuusorinngilaa.

KNR-ip kultureqarnermut Pisortaqarfiup, KIIIN-ip, ataani inissisimanera Frederik Lund-ip erseqqissarpaa. Taamaattumik KNR-imi pissutsinut attuumassuteqartunik isummersortoqassappat KIIIN aqqutigalugu suleriartarnissaq pissusissamisoornerpaajusussasoq Frederik Lundip oqaatigaa.

KNR-ip siulersuisuini ilaasortaq, Svend Møller, siulittaasup akissuteqarneranut tapersiilluni allagaqarpoq.

KNR-ip suliffeqarfittut aaqqissuussaaneranik oqallinneq imminullu pigisutut ingerlalersinnaaneranik isuma, ukiuni kingullerni marlunni siulersuisut oqaluuserisarsimavaat.

- Josef Motzfeldip oqallissaarinera ajunngilaq, ilumuunngilarli imatut nipilimmik oqarami tamanna isummerfiginiarsimanngivikkipput - KNR-immi suliffeqarfittut qanoq inissisimanera qaqilerlugu aallartippugut Josef Motzfeldtip tamatuminnga saqqummiussinera sioqqutingaatsiarlugu, Svend Møller allappoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq