KNR imminut ingerlattariaqalerpoq
Kalaallit Nunaata Radioata siulersuisuisa naalakkersuisunut inatsisartullu kultureqarnermut ataatsimiititaliaanut kajumissaarutigaat tusagassiuutit pillugit ataatsimiititaliamik pilersitsisoqassasoq.
Allattoq Najaaraq Egede
Kalaallit Nunaata Radioata siulersuisuisa naalakkersuisunut inatsisartullu kultureqarnermut ataatsimiititaliaanut kajumissaarutigaat tusagassiuutit pillugit ataatsimiititaliamik pilersitsisoqassasoq, KNR-illu imminut ingerlattup pilersinnissaa siunissami taassuma suliarissagaa.
Kaammattuuteqarneq tunngavilersorneqarpoq Kalaallit Nunaata Radioata naalakkersuisoqarfinnut qanippallaamik attaveqarnera ullutsinnut naleqqukkunnaarmat.
Siulersuisut qinigaaffimminni naggataartut ataatsimiinnerminni kingullermi ilaatigut aamma aappaagumut missingersuutit akueraat.