KNR-imi tusagassiortoq nersornaaserneqarnissamut innersuunneqarpoq

Inga Hansenip aallakaatitassiaa ”The Wandering Drum Dancer” raatiukkut aallakaatitassiat pitsaanersiukkat nersornaaserneqarnissaannut Kroatiami pisussami, innersuunneqartunut ilaavoq.
Allattoq Louise M. Kleemann
marsip 18-at 2011 09:11

Qilaatersortartoq Egon Sikivat pillugu aallakaatitassiaq piviusulersaarut aallakaatitassiat 65-it nunarsuarmi tamaneersut akornanni nersornaaserneqartussatut innersuunneqarpoq.

Aallakaatitassianik pitsaanersiukkanik unammisitsineq Priz Marulic Kroatiami pissaaq. Tassanilu Inga Hansen tusagassiortut allat arfinillit peqatigalugit nersornaaserneqarnissamut innersuunneqarpoq.

Egon Sikivat 67-inik ukioqarluni 2009-mi januaarimi toquvoq. Inga Hansenip Egon Sikivallu oqaloqatigiinneri Egon Sikivap toqujartuaarnera tikillugu immiussaapput.

Aallakaatitassiaq Europami radiukkut tv-ikkullu aallakaatitassianut nersornaasiinermi, Prix Europamik taaguutilimmi, siorna aamma innersuunneqartunut ilaavoq.

Nersornaasiineq Kroatiami qeqertat ilaanni Hvarimi maajip 13-ani pissaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq