KNR-imi soraarsitsiortorneq
KNR-imi sulisut arfineq marluk ullumikkut nalunaarfigineqarput soraarsinneqarlutik. Tamanna sulisut ualiartoq ataatsimiisinneqarneranni tamanut nalunaarutigineqarpoq.
- Tamanna assut ajuusaarnarpoq. Sulisut pikkorissut tunniussimalluinnartullu soraarsissallugit nuanninngitsorujuuvoq. Innuttaasunilli kiffartuussinissamik pisussaaffipput naammassisinnaaniassagutsigu tusagassiornermillu isornartorsiorfiusumik, qaammarsaanermik, ilinniartitsinermik aliikkusersuinermillu tunniussaqarsinnaassagutta KNR-imi sipaarneroqqissinnaanerput killeqarpoq, KNR-ip pisortaa Ivalo Egede nalunaarpoq.
Innuttaasunut kiffartuussivimmi Kalaallit Nunaata Radioani aningaasaqarnikkut periarfissat ukiuni kingullerni annikilliartorsimapput. 2010-mi KNR 400.000 kr.-inik ukiup ingerlanerani sipaarfigineqarpoq, 2011-milu aamma marloriarluni sipaarfigineqarpoq, sipaakkat katillugit 950.000 kr.-iullutik. Tusagassiuinermi Sulisut Peqatigiiffiat (TP) akissaatit pillugit isumaqatigiissut nutaaq aamma KNR-ip aningaasaqarneranut 2010-mi 2011-milu nammakkiisimavoq.
Aningaasat utaqqiisaasumik inissianut atorneqartartut Namminersorlutik Oqartussat 2010-mi qitiusumut katersorpai. Tamanna KNR-ip tapiissutisiarisartagaannit ukiut tamaasa 1,8 mio. kr.-it tiguneqartalernerinik KNR-imut kinguneqarpoq, pisortallu piffissami pineqartumi utaqqiisaasumik inissiamik tunniussisinnaagaangata aatsaat tassannga aningaasanik atuisoqarsinnaasarluni.
Ivalo Egedep erseqqissaatigaa tv-liorneq, radio-liorneq nittartakkakkullu siammarterineq aningaasartuuteqarnartuusoq.
- Piffissaq ungasinnerusoq eqqarsaatigalugu – pisinnaalerutta – freelancerit amerlanerusut suliassanut aalajangersimasunut atornerulerusuppagut. Kisianni inuiannguit kiisalu nunarujussuit tusagassiutitigut sullisissagaanni akia assigiippoq, Ivalo Egede erseqqissaavoq.
- KNR-imi tusagassiuuteqarneq pillugu politikkissaq ujartorparput, inuiaqatigiinni pisariaqartitat suliarineqarsinnaanissaat angujumallugu. Tusagassioriaaseq isornartorsiuisinnaasoq aamma nuna tamakkerlugu ilanngutassiorsinnaasoq pisariaqartipparput. Aamma innuttaasunut qaammarsaaneq aliikkuisersuinerlu torrallataq pisariaqartinneqarpoq, ilami nunannguarput imaannanngitsorsuaq tusagassiuutini malunnartumik saqqummersittariaqarpoq, KNR-ip pisortaa oqarpoq.
Piviusut:
Aningaasaliissutit iluanni suliaqarneruneq
KNR-imi aningaasaqarneq ukiuni arlalinni tamaviaarnartuusimavoq. Siullertut KNR suliatigut ukiut ingerlanerini annertusiartorsimavoq. Siullermik radiomuinnaq aallakaatitassiortoqartarpoq, taava TV internettilu takkupput, KNR-imullu aningaasaliissutaasartut annertoqataanik annertusaavigineqarsimanatik. Aappassaattullu TV-mi atortunut digitaliusunut 2007-imi pisiarineqartunut KNR suli akilersuivoq. 2024-ip tungaanut akilersuisoqassaaq, ukiorlu 2011-imi 2 mio. kr.-inik aningaasartuutaavoq.
Pisariillisaaneq
KNR ukiuni kingullerni marlunni ingerlatsinikkut pitsanngorsaasimavoq aningaasaqarnikkullu sukannersumik aqutsisimalluni. Allaffissornikkut atorfiit marluk 2010-mi atorunnaarsinneqarput, 2011-milu immikkoortortaqarfinni pisortat ikilisarneqarput. Pisortatut atorfiit marluk atorunnaarsinneqarput, atorfiillu inuttaqanngitsut arlariit inuttaleqqinneqartussaanatik. KNR-ip aningaasaqarnermut pisortamut aningaasartuutit annikillisarniarlugit suliassat suliffeqarfiup avataani suliarineqartalissapput. Taxanut, oqarasuaatinut internettumullu aningaasartuutit sipaarniarfigineqarput, kantiina matuneqarpoq, angalanerillu ilinniartitaanerlu annertuumik sipaarniarfigineqarlutik.