KNR-imi siulersuisut tusagassiorfissaarsuaq siunniuppaat
KNR, Atuagagdliutit, Sermitsiaq, Nuuk TV tusagassiorfiillu allat illoqatigiillutik allaffissornikkut kiffartuussinermullu aningaasartuutaasa ataatsimuulersinnissaat, KNR-imi siulersuisuni siulittaasunngorlaap Peter Jensenip takorloorpaa.
Allattoq Louise M. Kleemann
oktobarip 06-at 2009 12:41
Tusagassiorfiit assigiinngitsut illoqatigiilernerisigut allaffissornermut, saaffiginnittarfeqarnermut, allaffissornernullu allanut kiisalu atortunut aningaasartuutit sipaarneqarsinnaasorineqarput.
Pilersaarut KNR-imi sulisunut ataatsimiititsinermi siulersuisunut siulittaasumit Peter Jensenimit ullumi saqqummiunneqarpoq.
Imaanngilaq taamatut aaqqissuussinikkut kiffaanngissuseqarneq killilersorneqassasoq, tusagassiorfiilli kiffaanngissuseqarlutik sullissisinnaanerat attattuarneqassasoq, Peter Jensenip naqissuserpaa.
Aviisit Nuuk-TV-lu pilersaarummut soqutiginnillutik peqataajumasut siulittaasup ilisimatitsissutigaa.
KNR-ip namminersorluni aningaasaateqarfittut ingerlalernissaa Peter Jensenip aammattaaq sulissutiginiarpaa.
