KNR-imi siulersuisunik toqqaasarneq Oqalliffimmi sammineqassapput
Oqalliffimmi KNR Radiokkut ullaap tungaani aallakaatinneqartumi tamanna sammineqarpoq, Kultureqarnermut Naalakkersuisoq Nick Nielsen, Inuit Ataqatigiillu siulittaasuat Kuupik V. Kleist, peqataallutik.
Naalakkersuisut KNR-imik aqutsiniarsarisutut pasillerneqanngitsut, Inuit Ataqatigiit siulittaasuata Kuupik V. Kleistip oqaatigaa, KNR-imili siulersuisut ilaasortaqatissaminnik namminneq toqqaasinnaanissaat ammaffigineqarsinnaasoq, Inuit Ataqatigiit siulittaasuata erseqqissaatigaa:
- Naalakkersuisuugallaratta tusagassiornermi suliaqartut assigiinngitsut oqaloqatigisarpavut qanoq ittumik aaqqiinermi siunnerfeqassanerluta, tassanlu piareersaasiat ilaatigut imminut pigilersinnaaneranut tunngasut aallartinnikuuavut, isumaqaratta pingaarnerpaarpaarpaannut ilaasoq tusagassiorfiup KNR-itut ittup naalakersuinikkut kiffaanngissuseqarluni ingerlanneqarnissaa, aammalu tamatigoortuulluni tusagassioriaaseqarnissaa, Inuit Ataqatigiit siulittaasuat Kuupik V. Kleist oqarpoq.
KNR-ip qulangerlugulusooq Naalakkersuisunit iliuuseqarfiginiarneqarneranik oqaluttoqarnera ilumuunngitsoq, Kultureqarnermut Naalakkersuisup Nick Nielsenip attappaa.
Naalakkersuisummi Eqqumiitsuliornermut piorsarsimassutsimullu 2014-imit 2017-imut periusissiaanni tusarniaassutigineqaqqammersumi taama siunniussaqartoqanngilaq, Nick Nielsen oqarpoq:
- Aalajangersimaqqissaartumik siulersuisut Naalakkersuisullu inatsimmi taakkartorneqarput suut suliarissagaat, taakkualu toqqammavigalugit ingerlatsisoqassaaq. Taamaattumik ilisariuaminaatsittupilussuuara naalakkersuinermi KNR-imi akuliulluni ulluinnarni ingerlatsisoqarsinnaalluni oqalunneq. Taanna isumaqarpunga piviusorsiunngitsoq, taavalu inatsisissamut siunnersuutaasumut avaqqutsilluni oqallinneq uani pilersinneqartoq, Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoq Nick Nielsen, oqarpoq.
"Oqalliffik", KNR TV-kkut unnugu arfineq-pingasunut qiteqquppat kalaallisut aallakaatinneqarumaarpoq, qallunaatullu nalunaaqutaq arfineq-pingasunut aallakaatinneqarumaarluni.
Stina Skifte kalaallisut aaqqissuisuuvoq, Jonas Løvschall-Wedelilu qallunaatut aaqqissuisuulluni.
